Basha-Ramës: Lëri shfaqen në TV, shko në Laç tek banorët e prekur nga përmbytjet

Kryetari i Partisë Demokratike Lulzim Basha, së bashku me një album fotografik ku tregohet situata në Laç, i ka kërkuar Edi Ramës të lërë shfaqet në televizion e t’u japë ndihmë familjeve të përmbytura. Reagimi i kreut të opozitës, vjen fill pas takimit që Ramës mbajti me fermerët në Manzë.

“Edi Rama, sa rri në televizor e flet për investime imagjinare, të shkojë në Laç e të shikojë impaktin e “investimeve” të tij. Qindra familje janë në ujë e qindra të tjera në rrezik përmbytje. Asnjë ndihmë nga qeveria, asnjë mbështetje financiare dhe pse brenda një viti janë përmbytur pesë herë. Përballu me qytetarët që i ke lënë në mëshirë të fatit, mos u fshih pas regjisë qendrore me pseudo takime ku atyre që të thonë të vërtetën u mohon të drejtën e fjalës.”, citohet në reagimin e kryeopozitarit Basha.

Mbrëmjen e djeshme Laçi u përfshi nga reshje të dendura shiu, e për pasojë përroi doli nga shtrati duke përmbytur qytetin, katet e para të banesave, bizneseve, pro edhe tokat bujqësore. Po ashtu, ditën e sotme u shënua një 47-vjeçar humbi jetën nga përmbytjet, ndërsa situata vijon të ngelet problematike.