Kush fshihet pas 10 tonëve drogë të kapur në Vlorë?

Një oficer i policisë së Vlorës është shpallur në kërkim si pjesë e grupit të narkotrafikut të goditur nga Prokuroria e Krimeve të Rënda, që administronte 10 ton kanabis në dy fshatra të qytetit bregdetar.

Një burim i Lapsi.al tha se oficeri është drejtues i një zyre në drejtorinë e Policisë së Vlorës. Por ai nuk është emri më i rëndësishëm i grupit të strukturuar kriminal. Tre persona të tjerë, emra të njohur për policinë e Vlorës dhe organet e hetimit, janë drejtuesit dhe financuesit e këtij rrjeti.

Një efektiv i antidrogës në policinë e Vlorës i ka pohuar portalit HashtagAl se pronarët e vërtetë të ‘mallit’ mund të jenë kushërinjtë e ministrit të Brendshëm, Saimir Tahiri.

“Territori ku është kapur kanabisi është patronazh i vëllezërve Habilaj, kushërinj të parë të ministrit të Brendshëm, z. Tahiri. Kam asistuar operacionin dhe policët, përfshirë ata të ardhur nga Tirana, kanë qenë të intimiduar gjatë kryerjes së veprimeve, shoqërimeve dhe arrestimeve. Territori ku është bërë sekuestrimi i kanabisit nga policia është një territor ku punohet intensivisht. Në njërën prej kodrave, nga maja e të cilës ka fushëpamje totale të parcelave, policia ka ngritur një postë, e cila ruan territorin për llogari të mbrojtjes së kultivuesve”, citohet të ketë thënë ai.

Një tjetër burim i besueshëm në policinë e Vlorës, konfirmoi për Lapsi.al se drejtuesit e policisë së Vlorës kanë hezituar që të angazhojnë strukturat e tyre në operacion. Pas informacioneve që u ka vënë përpara Prokuroria e Krimeve të Rënda dhe Shërbimi Informativ Shtetëror ata kanë kërkuar që të përdoren Forcat e Ndërhyrjes së Shpejtë. Kjo për faktin se emrat e tre prej personave për të cilët kërkohej arrestimi, ishin të njohur dhe “njerëz të fuqishëm”, ndoshta “të lidhur edhe me shefat lart”.

I njëjti burim tha për Lapsi.al se implikimi i policisë së Vlorës shkon përtej oficerit të shpallur në kërkim. Zona ku është gjetur kanabisi, 7 300 rrënjë sipas policisë, ishte deklaruar “e pastër” nga policia.

Prokuroria e Krimeve të Rënda po heton mbi këtë të dhënë, por deri tani nuk ka drejtues të tjerë të policisë së Vlorës të vënë nën hetim. Plantacionet me kanabis u zbuluan nga një raport i SHISH dhe informacionet e mëpasme të shërbimeve sekrete se ato nuk ishin asgjësuar, siç referonte policia.

Arsyen përse policia e ka deklaruar “të pastër” zonën pritet ta zbardhin hetimet. Referuar burimit të HashtagAl, është lidhja e drejtuesve të grupit të narkotrafikut me ministrin Tahiri arsyeja e vërtetë se përse këto sipërfaqe nuk janë asgjësuar dhe për më tepër kanë qenë nën ruajtje nga policia për llogari të kultivuesve dhe trafikantëve të drogës.

Sot, kur mund të mburrej si herët e tjerë me operacionin antikanabis, ministri i Brendshëm nuk bëri asnjë deklaratë edhe pse doli para mediave. Në ceremoninë për prezantimin e makinave elektrike ai u shfaq i ngrysur dhe kërcënues ndaj prokurorisë dhe medias. I rreshtoi ato në aksin e së keqes, ndërkohë që të dhënat tregojnë se është policia e drejtuar prej tij që jo vetëm është rreshtuar me trafikantët e drogës, por edhe i ruan ato nga organet e tjera të zbatimit të ligjit.

Vëllezërit Habilaj janë akuzuar prej kohësh nga opozita si drejtues të një prej grupeve më të mëdha të trafikut të drogës në vend. Sipas PD, ata kanë përdorur edhe makinën e ministrit Tahiri, kushëririt të tyre, për të transportuar drogë jashtë vendit. Ministri i Brendshëm i pati mohuar fillimisht akuzat se Habilajt kishin në përdorim makinën e tij. Por me publikimin e disa dokumentave nga opozita, ai u detyrua të pranonte se ua kishte shitur atyre makinën, por nuk kishte bërë aktin ligjor të shitjes, për të shmangur pagesën e një detyrimi që lindte nga humbja e një gjyqi me opozitën. Një deklaratë e tillë e paprecedent shkaktoi reagime të forta në atë kohë, pasi Tahiri u bë i pari ministër që pranoi publikisht se kishte shkelur ligjin për t’iu shmangur detyrimeve që buronin nga një vendim gjykate.

Kushërinjtë e ministrit Tahiri akuzohen nga opozita se administrojnë sipërfaqet më të mëdha të kanabisit në Vlorë. Kryetari i PD tha sot se droga e sekuestruar ishte 20 ton, duke lënë të kuptohet se policia e kishte fshehur sasinë e saktë. /Lapsi.al