Plehrat/ Presidenti Nishani takon përfaqësues të shoqërisë civile

Presidenti Bujar Nishani, kur i kanë mbetur edhe 6 ditë kohë për të dekratuar ligjin e miratuar nga Parlamenti për importin e plehrave në Shqipëri, ka takuar sot përfaqësues të shpqërisë civile.

“AKIP sapo doli nga takimi me Presidentin. Qendruam rreth 3 ore dhe diskutuam gjere e gjate, me Presidentin duke shtruar gjithe argumentat ligjore, mjedisore, ekonomike, social dhe zhvillimor.

Nga ndjesia e takimit, mund shprehemi optimiste qe vendimi i Presidentit do te jete ne kundershtim te ligjit. Ne mbetemi beseplote qe kauza jone do te fitoje”, thuhet në faqen në Facebook të “Nisma Thurrje”.

Edhe vetë Presidenti Nishani ka lënë të kuptohet se do ta kthejë në Parlament ligjin për importin e mbetjeve, ligj ky që ka shkaktuar shumë debat dhe kundërshti nga shoqëria civile dhe opinioni publik.

Kreu i Shtetit shqiptar, duke e konsideruar çështjen e Ligjit për Importin e Mbetjeve si të një rëndësie madhore, me një ndjeshmëri të madhe në opinion publik e me ndikim të gjerë dhe afatgjatë në jetën e qytetarëve shqiptarë, e çmoi së tepërmi takimin konsultues me përfaqësues të shoqërisë civile dhe ambjentalistët si “shumë të vlefshëm në procesin e shqyrtimit dhe dekretimit të tij me seriozitet dhe përgjegjësi maksimale”.

“Çështjen dhe kauzën tuaj, për të cilën duhet të vazhdoni të këmbëngulni, po e trajtoj me shumë seriozitet ligjor, institucional dhe personal, jo vetëm në cilësinë e Kreut të Shtetit, por edhe si një qytetar shqiptar dhe si prind. Ju garantoj se përsa kohë do të jem në këtë Zyrë, nuk do ta zhgënjej asnjëherë interesin publik të qytetarëve!” – u shpreh Presidenti Nishani.

Ky takim konsultues, i thirrur përpara se Presidenti i Republikës të shprehet si interpretues i parë i Kushtetutës së Republikës, është i rëndësishëm, jo vetëm në aspektin juridik dhe legjislativ, por edhe në atë të interesit të qytetarëve për shkak të ndjeshmërisë së madhe që ka shkaktuar në opinion publik aprovimi i këtyre ndryshimeve ligjore në Kuvend.