Certifikohet gjykimi, arbitrat e Kosovës pranohen në FIFA

Pas pranimit të Federatës së Futbollit në UEFA e FIFA, radha është që edhe arbitrimi i saj të përfshihet në organizmat europianë. Nga edicioni 2017/18, arbitrat e Kosovës pritet të përfshihen në listat e FIFA-s për të drejtuar ndeshjet e futbollit në garat europiane, shkruan sot “Koha Ditore”.

FIFA ia ka konfirmuar Federatës së Futbollit të Kosovës se katër arbitra nga Kosova janë përfshirë në listat për t’iu nënshtruar testimeve dhe për të ndjekur seminaret, në mënyrë që të jenë të gatshëm për edicionin e ardhshëm. Prestigjiozja italiane “Republica.it” ka bërë me dije një lajm të tillë.

“Arbitrat Genc Nuza, Bujar Selimaj, Fatlum Berisha e Lumturie Muhadri priten të jenë arbitrat e parë ndërkombëtarë nga Kosova”, shkruan “Koha.net”. Ata do të marrin gradën fillestare, nëse kalojnë testet.

Në fakt, FFK-ja kohë më parë ka dërguar në FIFA një listë me emrat e arbitrave që plotësojnë kriteret për të ndarë drejtësinë në arenën ndërkombëtare, por vetëm katër prej tyre janë përzgjedhur.