Derbi i pazakontë/ Tirana dhe Partizani ndajnë pikët në ndeshjen e frikës

Derbi i shumëpritur nga tifozët ka përfunduar ashtu siç nisi, me rezultatin e bardhë 0-0.
Një sfidë që prodhoi gjithçka përveçse golave, grintë në fushë, stadium të mbushur plot, kartona të verdhë dhe të kuq, e mbi të gjitha edhe shtyrje të takimit.

I programuar për t’u luajtur të enjten dhe përfundoi mesditën e së premtes ishte ky derbi. Shkak për këtë u bë ndërprerja e energjisë në stadium që bëri të shtyhej ndeshja. Sot u luajtën minutat e mbetura, por asnjëra nga ekipet nuk arriti të shënoi.

Edhe pse loja në shumicën e kohës pati një ritëm të lartë mungoi finalizimi. Ekipet patën nga një rast të pastër me sulmuesit e tyre kryesor por që nuk arritën të dërgonin topin në rrjetë. Tirana këtë takim e mbylli me një lojtar më pak pasi Karabaci, njëkohësisht edhe kapiteni në minutën e 89-të mori kartonin e dytë të verdhë.

Kjo është ndeshja e dytë për këtë sezon mes këtyre ekipeve që përfundon me rezultatin e njëjtë 0-0. Me barazimin e dytë rresht, Tirana shkon në 11-të takime pa fituar kundër Partizanit.

Të kuqtë renditen në vendin e tretë me 24 pikë, një më shumë se Tirana, por tre më pak se kryesuesit Skëndërbeu dhe Kukësi.

(er.ko/BalkanWeb)