Java e modës në Nju Jork

Robert James ndërthuri modën me politikën në koleksionin e tij të ri, që u shfaq në ditën e parë të javës së modës njujorkeze për burra.

Stilisti amerikan tha se nuk kishte marrë dot pjesë në protesta pasi ishte i zënë me krijimet e reja dhe kishte vendosur të shprehte në pasarelë shqetësimet e tij përmes ngjyrave, materialeve e pankartave.

Koleksioni përbëhej kryesisht nga 3 ngjyra; ajo e ullirit, e përhimta dhe e zeza. Në disa prej veshjeve ishin përdorur pëlhura bambuje e materiale të tjera të dekompozueshme.

Shtëpia e modës “David Naman” u rikthye në javën njujorkeze për meshkuj me një koleksion të frymëzuar nga vitet ‘70.

“Deshëm të sillnim diçka argëtuese, veçanërisht sot kur njerëzit ndihen shumë të pasigurtë”, thotë kjo shtëpi.

Ndërsa dizenjatori me origjinë polake, Rafal Swiader shpalosi për herë të parë në javën e modës së Nju Jorkut brandin e tij të ri, R. Swiader, ku ndërthureshin elemente të punkut britanik me romanticitetin e Parisit.