Shembja e 3 kateve të pallatit tek Shkëmbi i Kavajës, procedohet biznesmeni i njohur

Biznesmeni që ka në pronësi, pallatin tek Shkëmbi i Kavajës, tre katet e të cilit u shembën pasditen e së premtes është proceduar penalisht nga Policia.

Enver Shala, 49 vjeç, me banim në Durres, është shpallur në kërkim. Ai akuzohet për dy vepra penale “Shkatërrim i pronës nga pakujdesia” dhe “shkelje e rregullave të mbrojtjes në punë”.

Struktura e tre kateve shtesë të një pallati në ndërtim tek “Shkëmbi i Kavajës u shemb  pasditen e së premtes duke rrezikuar jetën e banorëve. Fatmirësisht nuk pati të lënduar, por vetëm dëme materiale.

Sipas policisë, tre katet e fundit kanë qënë me konstruksione metalike dhe të papërfunduara, pasi nuk dispononte leje ndërtimi. Ky objekt i përket biznesmenit të njohur Enver Shala, i cili ka në bregdetin e Durrësit edhe një pallat tjetër 30-katësh. /abc