Basha në Kukës: Nxirreni PS-në me zero mandate

Basha në Kukës: Nxirreni PS-në me zero mandate, Rama dhe Meta sillen sikur katër vite kanë qenë në opozitë.

Kreu i PD-së Lulzim Basha ka pasur një kërkesë të qartë për kuksianët në zgjedhjet e 25 Qershorit, të nxjerrin PS-në me zero mandate në këtë qark. Sipas tij në gjithë këto ditë të fushatës Rama dhe Meta po sillen sikur këto katër vite kanë qenë në opozitë dhe jo në qeveri.

“Nxirreni nga Kukësi me zero deputetë dhe PD-së jepini tre mandate. Ditët e fundit kanë nisur mashtrimet nga fillimi. Së bashku me Ilir Metën flasin sikur kanë qenë në opozitë për katër vite. Edi Rama dhe Ilir Meta e kanë pranuar atë që e di unë, atë që dini ju, atë që e di e gjithë bota, që ata kanë dështuar në këto katër vite.

Kjo ka qenë qeveria më makute, më harbute që ka pasur Shqipëria në gjithë këto vite. Edi Rama nuk i mbajti premtimet e veta, pasi e kishte mendjen te teket e tij, prandaj në këto ditët e fundit është i njëjti njeri me fiksimin për timonin që e do vetëm për vete.

Me punët që nuk u hapën, me vendet e punës që avulluan, me universitetet që falimentuan. E vetmja zgjidhje është plani ekonomik i PD-së, është plani ynë ekonomik, i hartuar nga ekspertët më të mirë gjermanë”, u shpreh Basha.

Kujtojmë se Qarku i Kukësit ka tre mandate deputetësh në këto zgjedhje nga katër mandate që kishte katër vite më parë.