Ekstradimi hafaroz i Ramabajës

Shkruan: Reis Mirdita, Zvicër

Lexoj para disa çastesh në portalin Opozita.com (që nuk e njoh më thellë), për arrestimin e z. Ramabaja :

“Profesori univerzitar Dr. Sadri Ramabaja u arrestua në Durrës me urdhërin e ish prokurorit jugosllav Sylë Hoxha. Akuzat kundër Dr. Ramabajës u ngritën në bazë të dëshmive fiktive të jugosllavit Azem Vllasi i cili më herët ishte lider i komunistëve jugosllavë në Kosovë dhe kryetar i Lidhjes së Rinisë Komuniste të Jugosllavisë.
Dr. Ramabaja ka qenë i burgosur politik në Kosovë për shkak të veprimtarisë anti-jugosllave gjatë viteve të 80’-ta të shekullit të kaluar.
Duke filluar që në hetuesi e deri në mbarimin e burgut, Dr. Ramabaja ishte keqtrajtuar edhe nga udbashët shqipfolës të Kosovës ku dallohej Ali Vllasi, vëllau i liderit komunist Azem Vllasi i cili gjatë atyre viteve mbante postin e shefit të UDB-së në Kosovë.
Procesi i montuar politik kundër Dr. Sadri Ramabajës është kthim mbrapa i sistemit jugosllav i cili tani nuk respektohet as në Serbi.
Dr. Ramabaja akuzohet kinse për terrorizëm duke aluduar se ai bashkë me një grup tjetër patriotësh paskan përpiluar planin për vrasjen e disa politikanëve që i kanë shërbyer dhe vazhdojnë akoma t’u shërbejnë interesave të shtetit serb. Në shumë institucione të Kosovës, sidomos ato të drejtësisë dominojnë akoma ata që i kanë shërbyer sistemit jugosllav dhe dyshohet se akoma mbajnë lidhje me Serbinë. Fakti se po fillojnë procese të montuara politike kundër atyre që e kundërshtonin jugosllavine na tregon se drejtësia në Kosovë ka nevojë për një reformim të thellë.”
* * *

Me këtë, të them të drejtën, jam i pajtimit në të gjithë pjesët ku flitet për Vllasin si pishtar i Titos dhe komunist i përbetuar. Ai nuk mund të del nga lëkura e vet, është fakt. Komunizmin e ka në gjak.

Nga ana tjetër, Ramabaja, nëse nuk është e as nuk ndjehet fajtorë, pse tenton të largohet nga vendi me dokumente të huaja?! Edhe për këtë nuk do të zgjatem sepse ajo që irriton është një dukuri tjetër juridikisht destruktive në dy shtetet shqiptare.

Prangosja në rregull; por dorëzimi i personit të zënë me dokumente të huaja “në xhep” që tenton të lëshoj Shqipërinë drejt Italisë, është ilegal dhe thyerje e ligjit në të dy anët e kufirit edhe pse përgjegjësia kryesore bie mbi shtetin shqiptar. Personi në fjalë, nëse është ndaluar (rasti aktual), ai dërgohet në paraburgim duke ngritur procedurë ligjore për mashtrim, falsifikim e të tjera thyerje të ligjit në vendin ku është kryer veprimi dhe ku është venduar në pranga dhe aty duhet të gjykohet. Për akuzat (momentalisht në nivel dyshimi) për të cilat kërkohet një person i huaj në një shtet të huaj, janë një mori procedurash ligjore që duhet detyrimisht të respektohen dhe nuk mundet assesi i kërkuari të ekstradohet duke u rrasur në një furgon policie (apo tjetër mjet më “luksoz”) dhe me duar lidhur, hop e në kufi.

Për më tepër, nuk kemi asnjë njoftim nga ligjorët në Kosovë se kur u bë kërkesa për ekstradim, kush e bëri, kujt iu dërgua, cili ishte vendimi për dorëzim në kufi?
Mbrojtësit e Ramabajës duhet në mënyre urgjente të kërkojnë një numër sqarimesh nga të dy shtetet dhe pa humbur kohë të ngrenë akuza ndaj veprueseve të papërgjegjshëm.

Leave a Reply

Your email address will not be published. Required fields are marked *