Artur Ajazi:Luli nuk mund të bëhet Berishë/Luli ka dështuar

NGA: Artur AJAZI

Ajo ç’ka kreu i Partisë Demokratike Lulzim Basha dhe lista e tij po bëjnë në sallën e mbyllur të Kuvendit, padyshim nuk quhet as “opozitë dhe as luftë politike”, por thjesht një tentativë e dështuar e riingranimit të modelit të vjetëruar. Dështimin e tij Luli e ka ndjerë nga afër dhe nga larg, e ka ndjerë kur ai shpiku dhe ngriti  çadrën e “lirisë”, kur u ngjirr  duke kërkuar “zgjedhje të lira dhe të ndershme”, por edhe kur Rama pa shumë fjalë dhe lutje e thirri mesnatën e 17 majit për të firmosur pikat e marrëveshjes. Modeli i opozitës që është duke bërë Luli, sërish është dështim i sigurtë, pasi ai nuk mund të kopjojë asgjë nga Berisha. Ai nuk është Berishë, ai do të mbetet  Luli.

Synimi i opozitës së Lulit apo dhe “frontit  opozitar” për ta rrëzuar Edi Ramën nga pushteti nuk është i fshehtë, por me makinacionet që përdoren ai është i dështuar, i shtirur, i shitur. Synimi  i opozitës së Lulit,  duket i pafuqishëm në kontekstin e akuzave, pasi mungojnë elementët  e nevojshëm për të bindur sallat e mbyllura dhe sheshet padyshim, që ai po imagjinon  të “pushtojë”. Sot aktualisht në garë janë dy modele,  ai i Lulit, me refrenin  për gjoja “lidhje të politikanëve të lartë me krimin”, duke ëndërruar sikur Rama të mos e shpjerë gjer në fund mandatin si kryeministër, dhe modeli   “Rama” që  për herën e dytë fiton bindshëm me alternativën e tij  zgjedhjet për të qeverisur.

Por në fakt  opozita shqiptare , duket se nuk ka një model  alternativ  qeverisje, pasi Luli deri tani, po  synon vetëm rrëzimin nga pushteti të kryeministrit Rama, duke mos patur ai vetë një model tjetër. Deri tani faktet flasin se Luli është duke kopjuar keq, pa projektuar alternativat e opozitës, si një domosdoshmëri për t’ju kundërvënë modelit  të qeverisjes Rama.  Opozita e deritanishme e PD dhe  shtojcës saj “frontit të bashkuar opozitar”  mbetet në kufijtë e modelit të vjetëruar  të para 15 viteve, një opozitë pa ide,  e pakuptimtë, pa tipare të dukshme të një realiteti që ajo mund të ofrojë. E pamundura e Lulit qëndron tek imagjinata e tij, tek modeli i tij i dështuar, kurse  modeli Rama ( i provuar tashmë) rezulton të jetë  më modernist, pasi mbështetet  tek parimi  se “njeriu dhe vetëm ai mund ti japë vlerë  edhe objekteve pa jetë”.

Filozofia e modelit Rama, qëndron sot përballë  mungesës së modelit  të opozitës, bashkë me arritjet dhe dështimet e saj. Nga opozita e Lulit  dhe “frontit të bashkuar”  në sallat e mbyllura, deri tani kemi dëgjuar vetëm kritika spontane, të pavlera, që duken më tepër ai shashka të ç’aktivizuara. Opozita e PD, ka provuar dhe po provon  të dëshmojë  se,  “modeli Rama  nuk mund të krijojë vlerë, pasi vetë ai  është i pavlerë”.  Ajo çfarë ne kemi parë  dhe kemi dëgjuar deri sot  nga kreu demokrat, nga pikëpamja filozofike duket si një argument që nuk qëndron, pasi akuzat e tij nuk kanë vlerë në vetvete, ato janë thjesht spontane. Luli  harron se qytetarët nuk votojnë më për argumente të sajuara  politike, pasi ato  nuk mund të prodhojnë as bindje, as  vlerë dhe as fitore. Tek e fundit në qoftë se modeli Rama  sipas Lulit “është i pavlerë”,  përse ai votohet nga 2/3 e shqiptarëve, dhe pse modeli  i tij nuk votohet as nga 2/3 e demokratëve  në zgjedhje ?

Ajo ç’ka  sot përbën thelbin e opozitës së Lulit, mbetet vetëm rrëzimi  individit Rama nga pushteti, dhe jo i modelit të tij qeverisës. Kjo e fundit për shumicën e PD, ( e shprehur nën zë) mbetet një arritje që ka vlerat e veta  moderniste, në mungesë të një  modeli qeverisës  nga ana e opozitës. Qëndrimet e kësaj  të fundit, kanë vite që ngjallin  veçse dëshpërim tek qytetarët, që shohin tek lidershipi opozitar mungesën e shpresës, vlerave, programeve, dhe modelit  të ri qeverisës.

Titulli në origjinal:”Modeli dhe opozita Basha, e dështuar dhe e vjetëruar”.

Leave a Reply

Your email address will not be published. Required fields are marked *