Kapitenia e Vllaznisë, Erida Bajrakurtaj shuan debatin e portaleve: Femrat gjithmonë kanë…idhulli im…

Kapitenia e Vllaznisë dhe mbrojtësja e ekipit Kombëtar të Femrave, Erida Bajrakurtaj thotë se nuk ka idhull tjeter pervec te dashurit e saj. Duke folur per karrieren dhe debatin qe eshte hapur ne portale, te cilen e konsiderojne sportisten me te bukur, ajo shprehet se, “femrat gjithmonë kanë qenë krenaria e Shkodrës”.

Intervista për “Albanian Free Pres”:

Në Shqipëri mungon tradita e këtij sporti, por falë disa vajzave pasionante, futbolli i femrave dalëngadalë po fiton popullaritet edhe në vendin tonë. Ka vajza që e dashurojnë dhe falë pasionit, po e ngrenë këtë sport në nivele ndërkombëtare. Pas barazimit të kaluar me Poloninë, vajzat kuqezi pritën dje në “Elbasan Arena” Bjellorusinë, në takimin e 7-të të grupit, në eliminatoret e Botërorit. Përpara kësaj sfide, trajneri Armir Grima e kishte grupin e plotë, me përjashtim të kapitenes së Vllaznisë, Erida Bajrakurtaj. Lidhur me mungesën e fundit në ekipin kombëtar, Bajrakurtaj konfirmoi për “Albanian Free Press”: “Kam qenë e dëmtuar prej një muaji, prandaj edhe mungova në grumbullimin e fundit para ndeshjes ndaj Bjellorusisë.”

Bajrakutaj ka tërhequr shpesh vëmendjen e mediave dhe portaleve, jo vetëm për faktin se në Shqipëri futbolli i femrave konsiderohet ende një sport tabu për femrat, për shkak të paraqitjes së jashtme. Por ajo thotë se, është e fokusuar më tepër te profesioni që ka zgjedhur: futbollin, për të cilin thotë se e ka pasur ëndërr që kur ishte e vogël. Bajrakurtaj, 24-vjeçe nga Shkodra, është aktualisht pjesë e Vllaznisë, ekip që po dominon vitet e fundit futbollin shqiptar ndryshe nga ekipi i meshkujve. Erida Bajrakurtaj flet për karrierën që ka nisur, idhujt e saj në jetë, njerëzit që e mbështesin në këtë rrugëtim dhe disa vlerësime që i bëhen jashtë karrierës.    

Erida, si lindi pasioni juaj për futbollin?

E kam pasur ëndërr që e vogël futbollin. Edhe kjo ëndërr filloi të rritej më shumë çdo ditë, që kur nisa karrierën si profesioniste. Babai ishte edhe shtysa më e madhe për mua, në këtë karrierë.

Në Shqipëri, futbolli i femrave nuk është edhe aq i njohur, ndërkohë që misioni juaj edhe si pjesë e ekipit kombëtar, çfarë qëllimi ka në këtë sport kaq popullor dhe të dashur kudo në botë?

Futbolli i femrave, përditë e më shumë, po përhapet në Shqipëri dhe besoj se do të kemi shumë suksese në të ardhmen.

Jeni e lumtur pas disa viteve karrierë, mbi zgjedhjen tuaj mbi futbollin, apo e zhgënjyer?

Jam shumë e lumtur që kam zgjedhur këtë sport! Nuk jam ndjerë asnjëherë e zhgënjyer, sepse karriera ime do të vazhdojë edhe më gjatë, besoj. E dashuroj këtë sport…!

Nuk është e lehtë për një vajzë shqiptare të ndjekë ëndrrën e saj për të vazhduar karrierën në futboll, duke qenë se ky sport në vende disi konservatore si Shqipëria, konsiderohet më tepër sport për meshkuj. Apo jo?

Futbolli është si çdo sport tjetër, që e luajnë meshkujt dhe femrat. Të ndjekësh ëndrrën është gjëja më e bukur, pavarësisht ku jeton. Megjithëse çdo gjë ka vështirësitë e veta, por me përkrahje e me pasion arrihet çdo gjë.

Cilët janë njerëzit që ju përkrahin më tepër në karrierën tuaj si futbolliste?

Familja është ajo që më përkrah në çdo hap timin. Po të mos kisha përkrahjen dhe dashurinë e tyre, nuk do isha sot kjo që jam. Prandaj, falënderoj zotin që e kam!

Vllaznia në futboll për meshkuj, ka disa vite që rrezikon rënien. Ndërsa në futbollin e femrave, është kampione. A mendoni se tani janë femrat krenaria e Shkodrës, duke qenë se edhe bashkia e qytetit drejtohet nga një femër?

Femrat gjithmonë kanë qenë krenaria e Shkodrës, jo vetëm në sport, por edhe në fusha të tjera si art, politikë etj. Megjithatë, edhe ekipit të Vllaznisë së meshkujve, i uroj të ketë gjithmonë fitore, ashtu siç kanë vajzat e Vllaznisë.

Përveç futbollit, cilat janë pasionet apo angazhimet e tjera?

Një tjetër pasion imi, përveç sportit dhe udhëtimeve, është dhe modelingu. Megjithatë do ia lë kohës. Angazhime të tjera kam shkollën, palestrën. Pjesën tjetër të kohës e kaloj me familjen dhe shoqërinë.

Cili është idhulli juaj në jetë?

Idhull kam veç të dashurin tim. Vetëm atë kam në sytë dhe zemrën time. Përveç tij, s’kam idhull tjetër.

Ambiciet dhe ëndrrat tuaja si futbolliste, sidomos në përfaqësimin me Kombëtaren, cilat janë?

(Qesh) ëndrrat ?! Pothuajse gjysmën e ëndrrave i kam të plotësuara, pasi zemrën dhe jetën e kam plot. Faleminderit zotit! Sa i takon ambicieve, do të punoj me shpirt që dhe ekipi Kombëtar të jetë gjithmonë kampion! Pasi me dëshirë dhe vullnet arrihet çdo gjë.

Keni tërhequr shpesh vëmendjen e mediave apo portaleve për paraqitjen. Ju konsiderojnë si sportistja më e bukur në Shqipëri…

I falënderoj shumë mediat dhe portalet, që më kanë konsideruar si sportisten më të mirë në Shqipëri! Kanë një falënderim të veçantë nga ana ime, por nuk besoj se ka shumë rëndësi se cila është sportistja më e bukur në vendin tonë, sepse sporti nuk është konkurs bukurie. Por vlerësoj maksimalisht, çdo vëmendje që i kushtohet futbollit të femrave, apo edhe sportit në përgjithësi. Sa më tepër të pasqyrohet sporti, aq më tepër besoj se kjo shkon në dobi të shoqërisë sonë. Kjo të paktën ndodh edhe në vendet e zhvilluara.

Leave a Reply

Your email address will not be published. Required fields are marked *