Prezantohet gjetja e 571 skedave të fjalorit etimologjik të Norbert Jokli-t

Prishtinë, 30 prill 2018

Juristi dhe studiuesi nga Shqipëria, Agron Alibali, sot, në Bibliotekën Kombëtare të Kosovës “Pjetër Bogdani” bëri prezantimin e një gjetjeje të rrallë – skedave të fjalorit etimologjik të shkruar nga albanologu Norbert Jokl.

Të pranishëm në këtë aktivitet kulturor ishin përfaqësues nga fusha e letërsisë, kulturës, bibliotekarisë si dhe studiues dhe dashamirës të fushës së albanologjisë.

Trashëgimia bibliotekare e Jokl-it, ashtu siç tha Alibali në hapje të kësaj veprimtarie, përbëhej nga libra tejet të çmuar e të rrallë që përbënin Bibliotekën e Joklit, dhjetëra dorëshkrime e mijëra letërkëmbime. Një letër e autoriteteve gjermane e 10 shtatorit 1942, afër kohës së sekuestrimit të Bibliotekës së Jokl-it, e jep gjendjen më të saktë të kësaj biblioteke, ku shkruhej se ajo përfshin afërsisht 3000 vëllime dhe se përmban revista, fjalorë, libra gjuhësie, doracakë, libra reference dhe traktate gjuhësore të çdo lloji.

Ashtu siç rikujtoi Alibali, albanologu Jokl-i është marrë kryesisht mestudimin e gjuhës shqipe dhe ka mbledhur literaturën dhe monumente gjuhësore të shqipes. Ai ka grumbulluar pothuajse në të njëjtën mënyrë edhe literaturën e nevojshme për një studim të të gjitha gjuhëve të Europës Juglindore.

Autori Alibali shpjegoi se biblioteka e Jokl-it përbën një bibliotekë veçanërisht specifike që i nevojitet vetëm studiuesit të gjuhësisë së krahasuar, i cili ka zgjedhur si fushë studimi një hapësirë ku takohen gjuhët gjermanike, sllave, romane, ugro-fine dhe të tjera. Sipas autorit, kjo bibliotekë e specializuar duket të jetë e plotësuar me vepra të përgjithshme mbi antikitetin, historinë, filozofinë dhe kulturën e vendeve dhe të popujve të hapësirës së përmendur.

Në kuadër të këtij prezantimi, studiuesi Alibali paraqiti Skedarin e Fjalorit Etimologjik të Joklit, pjesës së parë të të cilit i përkasin 169 skeda, pjesës së dytë 196 dhe pjesës së tretë 206.
Pasi foli për jetën dhe veprën e Jokl-it, Alibali porositi studiuesit dhe gjuhëtarët që të vazhdojnë me studimin dhe hulumtimin e veprës së tij.

Autori Agron Alibali ua dhuroi nga një kopje digjitale të fjalorit Bibliotekës Kombëtare të Kosovës, Institutit Albanologjik të Kosovës, Akademisë së Shkencave dhe të Arteve të Kosovës dhe Fakultetit Filologjik të Universitetit të Prishtinës.

Marrë nga biblioteka kombëtare e Kosovës “Pjetër Bogdani”, Prishtinë