Vrau dy persona dhe plagosi 4 të tjerë në 2016, i dënuari me burgim të përjetshëm: Isha droguar

Gjykata e Shkallës së Parë Shkodër ka dënuar me “Burgim të përjetshëm” shtetasin Miklovan Parubi, i cili akuzohet për vrasjen e dy personave dhe plagosjen e 4 të tjerëve në në vitin 2016. Mbi të rëndojnë veprat penale, “Vrasje në rrethana cilësuese, e kryer në bashkëpunim”, “Vrasje në rrethana cilësuese e mbetur në tentativë e kryer në bashkëpunim”, “Armë mbajtje pa leje” dhe “prodhim dhe shitje të lëndëve narkotike”.

Me dënimin me burg të përjetshëm, Gjykata e Shkodrës ka miratuar kështu kërkesën e organit të akuzës i cili përfaqësohej nga prokurori i çështjes Vat Staka.

Ndërsa për shtetasin e dyshuar si bashkëpunëtor në kryerjen e krimit, Marçel Shpijati, është dënuar me 3 vite burg duke ndryshuar veprën penale, nga “Vrasje me dashje e kryer në bashkëpunim” në “Moskallëzim të krimit”.

Shtetasi Miklovan Parubi me 3 tetor të vitit 2016 në Dajç të Shkodrës ka hyrë në një nga lokalet e zonës në përdorim të shtetasit Arjet Seiti, dhe ka qëlluar me breshëri automatike duke lënë të vdekur 2 shtetas, dhe duke plagosur 4 të tjerë.

Gjatë seancës gjyqësore ai është shprehur se:

“Unë nuk e di se pse, pasi gjithë personat i kam shokë jete, kam qenë i dehur dhe kam konsumuar hashash, kam marrë në qafë shumë familje, dhe familjen time. Nuk kërkoj asgjë, vetëm drejtësi. Po ju lutem Marçelin mos e merrni në qaf, sepse ai s’ka lidhje me këtë ngjarje”.

Prokurori i çështjes Vat Staka ka kërkuar dënimin me burgim të përjetshëm. Gjatë seancës avokatja mbrojtëse Kristina Marku, ka kërkuar ndryshimin e veprës penale nga “Vrasje në rrethana cilësuese e kryer në bashkëpunim” në “Vrasje në kushtet e tronditjes së rëndë psikike”, ndërsa për veprën penale “Plagosje në rrethana cilësuese e mbetur në tentativë”, në “plagosje e lehtë me dashje”.

Nga ana tjetër, Blerim Bazhdari, avokati i shtetasit Marçel Shpijati, i cili akuzohet si bashkëpunëtor në këtë vepër penale, ka kërkuar ndryshimin e masës së sigurisë për klientin e tij.
Sipas mbrojtjes, shtetasi Shpijati nuk ka pasur dijeni për planin e shtetasit Parubi, dhe se gjatë gjithë kohës ky shtetas ka bashkëpunuar me policinë, duke u vetëdorëzuar dhe duke sqaruar gjitha rrethanat e ngjarjes.

Mbrojtja ka kërkuar që të bëhet ndryshimi i veprës penale nga “Vrasje në rrethana cilësuese e kryer në bashkëpunim” në “Moskallëzim të krimit”, çka u pranua nga Gjykata.

Prokurori i çështjes Vat Staka në fjalën e tij ka kërkuar dënimin me burgim të përjetshëm për shtetasin Miklovan Parubi, ndërsa për shtetasin Marçel Shpijati dënimin me 20 vite burg.

Gjykata pasi ka administruar provat ka lënë në fuqi kërkesën e prokurorit Vat Staka për autorin e ngjarjes, si dhe ka miratuar kërkesën e avokatit Blerim Bazhdari në ndryshimin e veprës penale për shtetasin Marçel Shpijati.