Kur shteti e zë lepurin me kerr

Shkruan: Agim Sylejmani, Zvicër

 

Thuhej se shteti e zë “lepurin” me “kerr”. Dhe jo vetëm lepurin, sepse sot shteti e “zë” kë të dojë, si të dojë dhe kur të dojë, me faj e pa faj, sipas oreksit ditor të politikës! Për çudinë e shumëkujt, “sulmuesit” e Arbana Xharrës sot e kësaj dite nuk u “zunë” kurrë. As me “kerr” e as pa “kerr”! As nuk u raportua lidhur me hetimet e rastit në fjalë. Sikur të mos ketë ndodhur kurrë. Rasti i Arbana Xharrës la shumë pikëpyetje, si për mënyrën e realizimit të “sulmit”, njoftimit në media, trajtimit të rastit nga ana e politikës, “fotografitë” që “rastësisht” i bëri “ndokush” në korridorin e urgjencës, etj. etj. Gjithë pluhurin sikur e treti dhe e humbi një fqinj i saj, i cili njoftoi opinionin se Arbana nuk ishte “rrahur” për herë të parë, por edhe shumë herë tjera, dhe atë – nga bashkëshorti i saj!

Arbana Xharra njihet si “gazetare” hulumtuese. Ajo i “hulumton” e “gjurmon” edhe “terroristat”, e kë nuk e gjurmon ajo. Vetëm “sulmuesit” e saj nuk arriti t’i gjurmojë kurrë! Sikur qenkan të pakapshëm këta “sulmuesit” e Arbanës, të cilët as “shteti” nuk i “zënka” dot! Sikur nëpër filmat me “ningjat”, që janë të mbështjellur me të zeza, si vetë nata! Edhe Arbana u “kthye” natën vonë në shtëpi. Pas “sulmit” në fjalë ajo nuk i telefonoi bashkëshortit që ishte një kat më lart në banesë, por “shoqëruesit” të saj atë natë të zezë në atë rrugëtimin e saj, gjoja nga Tirana!

Unë vetë nuk i përkas asnjë besimi fetar dhe identifikohem vetëm me përkatësinë time kombëtare, jam shqiptar. Me probleme të fesë dhe besimeve nuk merrem dhe nuk dua të merrem. Prandaj edhe nuk kam frikë se do të më “gjurmojë” Arbana Xharra. Në rrjetin social një “teolog” kishte shkruar se Arbana po përpiqet me shkrimet e fundit të përfitojë “azil” politik në SHBA. Nëse Arbana Xharra përpiqet të përfitojë ndonjë leje qëndrimi atje duke hedhur benzinë në zjarrin e ndjenjave fetare të njerëzve, atëherë duhet gjurmuar “rrënjët” e vërteta të Arbanës.

Kohëve të fundit kemi “azilkërkues” me arsyetimet nga më të çuditshme, pra edhe të kësaj natyre siç e përshkruan “teologu”. Është shumë e vërtetë se ka edhe prej tyre që ua “fusin” vetes vetëm e vetëm për të dëshmuar se e kanë “zanat”…. Ka prej tyre që edhe lidhin kontrata bashkëjetese me gjini të ngjashme si të vetes, për të “dëshmuar” se në Kosovë janë të “rrezikuar”! Në këso rastesh nuk kanë nevojë më t’ua “fusin” vetes, se kanë kush ….

Ka prej tyre që vërtetë edhe e rrahin veten, për të dëshmuar “lëndimet” e shkaktuara për shkak të “zanatit” të tyre në vendlindje. E krejt kjo kur në Prishtinë, nën patronatin e presidentit të Kosovës, marshojnë LGBT me presidentin në krye!!! Natyrisht që aty nuk mungon as ministri Enver Hoxhaj, sepse, helbete…!

Kam përshtypje se është më mirë që disa të injorohen, të mos u përmendet emri as për të keq, sepse, tek e fundit, ata persona këtë duan, të gjenden në ballinat e portaleve dhe gazetave dhe mundësisht nëpër rrjetet sociale, për të krijuar “imazhet” për këta persona, jo vetëm për Arbana Xharrën, këtë “gazetare” të oborrit presidencial të Hashimit dhe Kadriut, për të cilën nuk ia vlen asnjë shkronjë e shkruar, e lere më të merresh me të, edhe pse unë sot, megjithate, u mora me te. Kjo nga arsyeja se deri ku mund të shkojnë sot “gazetarët” e tillë, që shkruajnë e publikojnë me porosi të padronëve.

Në kohën kur Arbana Xharra iu “fut” politikës, nuk ishte e vetmuar, sepse një mori “gazetarësh” dhe “anal-istësh” iu “futën” politikës. Jo për tjetër, por nuk mund të fshiheshin më se për kë punonin, për kë shkruanin e publikonin. Kjo më ka kthyer në kujtesë mënyrën e veprimit të UDB-së famëkeqe. Spiunët dhe lidhjet e tyre operative kur i zbulonin në popull, brenda ditës bëheshin me kartela pune në organet e ndjekjes të UDB-së jugosllave! Si atëherë ashtu edhe sot! Si nën atë regjim, ashtu edhe nën këtë regjim! E njëjta praktikë e veprimit të të inkriminuarve dhe sahanlëpirësve!

Athua kur do të ndërgjegjësohemi dhe të arrijmë të dallojmë të zezën nga e bardha? Apo ndoshta kemi humbur shqisat e mirëfillta të të pamurit, e pse jo, edhe të të nuhaturit!? Është koha e fundit që të hapim sytë çfarë na servojnë sotë mediat e pushtuara dhe të orkestruara nga pushteti dhe “gazetarët” e paguar të oborrit! Sepse, pikërisht përmes këso “gazetarësh” dhe “anal-istash” manipuloi me popullatën e mjerë ky pushtet tejet antikombëtar me shitjen e territoreve gjoja si “parakusht” për të ashtuquajturin “liberalizim” të vizave dhe lëvizjen e “lirë” të shqiptarëve të Kosovës! Një “liberalizim” i tillë as nuk u bë, e as që pritet të bëhet edhe një kohë të gjatë.

Duhet të ruhemi nga “mesazhet” e përgatitura të pushtetmbajtëve të sotëm që na dërgojnë përmes “gazetarëve” edhe për “idenë e re” (idenë e vjetëruar serbe) për “shkëmbim” territoresh, për “korrigjim” kufinjsh, e së voni edhe për “lëvizje” të kufirit! E gjithë kjo në dëm të Kosovës dhe për llogari territoresh arbërore, duke e krijuar një Sërbska Republikë brenda Kosovës, e cila pas 20 vitesh ka të drejtën e shkëputjes nga Kosova dhe bashkangjitjes me Serbinë. Ndërsa shpresa e Hashimit që me disa fshatra të Preshevës që do i “bashkoheshin” Kosovës do të mashtrojë më lehtë shqiptarët, fillimisht ata të Kosovës Lindore, e pastaj edhe ata të Kosovës, shumë shpejt do të shuhet si fluskë sapuni, sepse nga terreni sot njoftojnë se shumë fshatra të Kosovës Lindore, sikur edhe Tërrnoci i Madh, janë rrethuar me ushtri e polici serbe.