Të shtëna me armë zjarri pranë universitetit të Vlorës, ja kush ishte objektivi

Të shtëna me armë zjarri janë regjistruar mbrëmjen e sotme pranë universitetit “Ismail Qemali”, të Vlorës, fatmirësisht pa të lënduar. Ngjarja ka ndodhur në një prej zonave më të frekuentuara, duke shkaktuar panik te pushuesit e shumtë në qytetin bregdetar.

Zona e Skelës dhe pjesa përgjatë Lungomares dominohet nga pushuesit vendas dhe të huaj, veçanërisht orëve të mbrëmjes të cilët e shfrytëzojnë atë për shëtitje.

Nga të dhënat paraprake, dyshohet se është qëlluar me armë drejt një automjeti pas një konflikti të momentit për motive banale. Ngjarja ka ndodhur në një bllok pallatesh.

Policia ka shkuar në vendin e ngjarjes, ku ka identifikuar autorin e ngjarjes dhe po punohet për arrestimin e tij. Paraprakisht thuhet se autori i të shtënave është shtetasi me iniciale L. B.

Në vendin e ngjarjes janë gjetur disa gëzhoja. Po zhvillohet hetime për të zbardhur ngjarjen.