Në 2 vitet e fundit, rreth 400 mjekë janë larguar nga Shqipëria

Në 2 vitet e fundit janë larguar nga Shqipëria rreth 400 mjekë. Shifra është publikuar nga sindikata. “Fenomeni vijon me këtë ritëm pas pak vitesh rrezikojmë të mbetemi pa mjekë dhe shumica e spitaleve të rretheve do mbyllen përfundimisht”, thuhet në njoftim.

Konferederata e Sindikatave i kërkon qeverisë të mos qendrojë indiferente. Sipas saj, masat e marra nga qeveria nuk kanë rezultuar efikase, ndaj Konfederata e Sindikatave të Shqipërisë i bën apel Ministrisë së Shëndetësisë të ndjeke shembullin e vendeve si Bullgaria apo Rumania dhe Turqia, vend i cili është kthyer sot në simbol të zhvillimit të sektorit të shëndetësisë, falë ndërhyrjes së shtetit. Ndërkohë edhe fqinjët tanë, Maqedonia Mali i zi por edhe Serbia po ndjekin të njëjtën praktike kanë nisur rritjen e pagave për njerëzit e sektorit të shëndetësisë, me synim frenimin e largimit të kapaciteteve shëndetësore.

Rritja e pagave deri në 2 mijë euro

Konferederata e Sindikatave Konfederata e Sindikatave të Shqipërisë thotë se ka ngritur një grupe punë me mjeke dhe ekspertë ekonomie dhe do ti dërgojë qeverisë një paketë propozimesh, ku përfshihen rritja e pagave deri në 2 mijë euro në muaj për mjekët dhe paga deri në 1 mijë euro në muaj për infermierët.

“Qeverisë do ti propozohet rritja e mbështetjes për specializimet jashtë vendit, si dhe mundësimi i bursave në universitetet e mjekësisë në vendet e BE për nxënësit ekselent.

Kjo është e vetmja forme për të parandaluar arratisjen e mjekëve dhe nxitjen e të rinjve për të ndjekur Universitetin e Mjekësisë”, thuhet në njoftim.

Rritja e pagave për bluzat e bardha do pasohej më një reformim të sistemit shëndetësor, pasi do të ulej ndjeshëm korrupsioni dhe do rriteshin investimet.

Janë me miliona euro që qeveria heq nga buxheti për makina luksoze, mobilime zyrash për shumë institucione që nuk janë funksionale dhe një sektor jetik për shoqërinë e ka lënë në mëshirë të fatit.