Adoleshenti me paralizë cerebrale përdoret nga “shokët” si urë për të kaluar ujin e ftohtë

Një video shokuese, e cila është bërë virale në internet, tregon se si një adoleshent me aftësi të veçanta, përdoret si urë njerëzore nga shokët e tij të shkollës.

14-vjeçari, Brett Corbett u detyrua nga bashkëmoshatarët e tij që të shtrihej në një rrëke me ujë të fohtë në Nova Scotia, Kanada të martën e kaluar, teksa ata e tallnin dhe ecnin mbi të pa pikën e dhembshurisë.

Pamjet e tmerrshme u bënë virale në rrjet duke bërë që lajmi të shkonte deri tek autoritetet të cilat kanë nisur një hetim policor. Në shkollën e 14-vjeçarit me paralizë cerebrale pritet të mbahen edhe protesta kundër dhunës.

Djali ishte justifikuar në shtëpi duke i thënë të ëmës, Terri McEachern, se kishte vënë bast me shokët që të notonte në luginën prapa shkollës së tij. Por, videot e filmuara tregojnë një histori të ndryshme.

Të paktën tre studentë e përdorën Brett-in si urë njerëzore, ndërsa të tjerët i hodhën gurë ndërsa ai qëndronte në mes të rrëkesë me ujë të ftohtë.