Shikoni, kur ministria Balluku e nxirrte sheshit “Zogun” e Kryetarit

Ndryshimet e djeshme në kabinetin qeveritar prekën edhe disa nga ministritë më të rëndësishme në drejtimin e vendit. Nga ndryshimi u prek edhe ministria e Infrastrukturës dhe Energjitikës, ku Damian Gjiknuri u zëvendësua nga Belinda Balluku.

Balluku është një emër i lakuar, e cila që prej ardhjes së PS në pushtet ka drejtuar agjensitë shtetërore që menaxhojnë trafikun ajror. Që në fakt janë të lakmueshme për shkak të vetëfinancimit dhe fondeve të mëdha duke u shndërruar shpeshherë dhe në pika të marrëveshjeve postelektorale mes partive që bashkëqeverisin.

Si një nga emërimet e para të qeverisë në vitin 2013, zonja Balluku ka qenë kohët e fundit në qendër të akuzave për keqpërdorimin e fondeve të Albcontroll-it. Institucioni i drejtuar prej saj ka paguar plot 66 milionë lekë për të trajnuar dy anëtarë të stafit. TPZ publikoi pak kohë më parë dhe dokumentat përkatëse, duke hedhur dritë mbi një seri tenderash me që drejtuesja e kompanisë i jepte me vlerën 100% vetëm një ofertuesi.

Ndërkohë sipas PD, 70% e procedurave të zhvilluara nga Albcontroll 5 vitet e fundit kanë qenë me prokurim të drejtëpërdrejtë, ndërsa vlera ka kapur shifrën e 20 miliardë lekeve.

Por këto akuza duket se nuk e kanë shqetësuar zonjën Balluku, e cila si drejtuese institucioni, me tender te hapur apo me prokurim të drejtëpërdrejtë i ka organizuar stafit një super mbrëmje për festat e fundvitit.

Portali informativ “Opinion.al” ka publikuar disa foto dhe një video të shkurtër ku në një ambient të dekoruar me kujdes,me balerina të veshura si në karnavale, stafi i Albcontroll ka festuar deri në orët e para të mëngjesit në të vetmin hotel me 5 yje në Tiranë, tek “Plaza Hotel”. Sigurisht që festa është organizuar rreth një javë më parë, kur zonja Balluku nuk ishte zgjedhur ende si ministrja e re e Infrastrukturës dhe Energjitikës.