AGJENSITË TURISTIKE NË KAOS? MBYLLET QENDRA E SKIJIMIT NË BREZOVICË, PAS VDEKJES SË ZV.MINISTRIT SHQIPTAR

Foto ilustruese nga Brezovica

Arian Daci, zv.ministri i Diasporës në qeverinë e Kosovës, ka ndërruar jetë ditën e sotme pas rënies së një orteku bore në qendrën e skijimit në Brezovicë, i cili e zuri përsipër.

Por menjëherë pas ngjarjes së rëndë, Agjensia e Mbrojtjes së Mjedisit të Kosovës (AMMK) ka marrë vendim që qendra e skijimit në Brezovicë të mbyllet për dy ditë, derisa të përfundojnë hetimet.

“E gjithë qendra do të mbyllet për dy ditë si pasojë e ngjarjes dhe hetimeve që do të zhvillohen për rastin si dhe pritet rrezik edhe nga një ortek i borës. Agjencia e Mjedisit ka paralajmëruar mbrëmë se gjendja është shumë e vështirë si pasojë e reshjeve shumë të mëdha dhe s’ka qenë e mundur të pastrohen as rrugët e as pista në Qendër”, ka thënë drejtori i AMMK, Ilir Morina.

Por mbyllja e qëndrës së skijimit në Brezovicë fut në kaos gjithë agjensitë turistike nga Shqipëria dhe jo vetëm. Shumë nga agjensitë planifikojnë çdo ditë udhëtime në Brezovicë, të cilat përfshijnë qëndrime dy ditore dhe më tepër.