Ministrat e shkarkuar, kur ishin në kolltuqe nuk hapnin as telefonin, tani po “puthen” me popullin

Pasi kanë “rënë nga fiku”, po shfaqen sikur deri tani, të mos kenë qenë këta, që me zullumet dhe shpërfilljen e tyre prej sundimtari, “ia plasën buzën” shqiptarëve prej mëse 5 vitesh

Gjashtë ministrat ende në detyrë, po publikojnë video e mesazhe, nga takimet që kanë bërë me popullin pas shkarkimit, ku shfaqen me gota urimi, në familjet e zonave të tyre elektorale, duke shpëndarë pako. duke përkëdhelur e puthur fëmijë dhe njerëz të varfër.

Janë pamje të pështira, që faktikisht, tregojnë hipokrizinë e kastës, mbasi fytyra e tyre e vërtetë, nuk është kjo që po ekspozojnë pas shkarkimit, por ajo e kohës, kur nuk donin t’ia dinin, nëse njerëzit ishin gjallë e kur nuk të hapnin as telefonin.

Pas shkarkimit, Ministrja e Kulturës Mirela Kumbaro shkoi në Gjirokastër, ku bëri takime me popullin dhe ndau ca dhurata për fëmijët e varfër, ndërkohë që deri para shkarkimit, nuk u hapte as telefonin banorëve e jo të shkonte të pinte kafe në “kasollet” e tyre.

Këtë gjë bëri dhe ministri Arben Ahmteaj, i cili pas shkarkimit, vrapoi drejt zonës Kavajë-Rrogozhinë, me pako e urime për disa familje të varfëra, duke u hequr si popull e jo si ministër, por deri para 29 dhjetorit 2018, më lehtë takoje Edin, se sa Benin.

Po kaq komik u shfaq pas shkarkimit edhe ministri “guru” Damian Gjiknuri, i cili vrapoi drejt Vlorës, për t’u “puthur” me popullin e zonës elektorale, por deri para shkarkimit, nuk i përfillte, u jepte numra telefoni që nuk hapeshin dhe sa herë shkonte atje, takohej vetëm me mafiozët tokave dhe shtetarët e zones, që bënin pazare tenderësh.

Si të kishin maska e jo fytyra, po kaq “të dashur e të shkrirë me popullin”, u shfaqën me banorët në zonat e tyre, dhe ministri Ditmir Bushati në Shkodër, Lindita Nikolla në Lezhë e Mirditë dhe Niko Peleshi në Korçë, duke bërë, sikur deri tani, nuk kanë qenë po këta zullumqarë, që ishin mëse 5 vite në kolltuqe e nuk donin t’ia dinin për hallet e njerëzve.