Rama rikthen grupin çiftelia / Voci emërohet shef i krimeve!

Tonin Vocaj, ky kamikaz i Berishës, ishte njeriu që mbylli vrasjen e Trebickës, që rrezikonte të dekonspironte e nxirrte fakte e prova kundër Shkelzen Berishës për përzierjen e rëndë në aferën e municioneve në punishten e Gërdecit. Ai u gjet i vdekur në mes të fushës në Korçë teksa kishte shkuar për “gjueti” në kulmin e përplasjeve, intervistave dhe kërcënimeve me familjen Berisha, me kafkë të shtypur por pa gjak dhe me një gjah shpend (shapkë Myzeqeje) të “vrarë” në Korçë. Si i shpërbleu Berisha grupin “çiftelia” pas manipulimit të vrasjes së biznesmenit, të cilët i shpëtuan djalin nga burgu. Rama, me rikthimin në postin që ka patur të Vocajt në polici, jo vetëm rehabilitoi një grup kriminal, por varrosi dosjen e “Gërdecit”dhe kryekomisar Lamajt

Edi Rama ka braktisur përfundimisht kauzën për të cilën shqiptarët e votuan dy herë rresht, përkatësisht në zgjedhjet parlamentare të vitit 2013 dhe 2017. Kryeministri aktual dhe PS nuk janë votuar as se dukeshin më të mirë se Berisha në zgjedhjet e qershorit të para 6 viteve, as se kishin qeverisur më mirë se PD në mandatin e parë qeverisës bashkë me LSI-në e Ilir Metës.

Edi Rama dhe PS janë votuar në të dyja palët e zgjedhjeve vetëm për një qëllim: futjen në burg të Sali Berishës dhe zhdukjen nga rrënjët të së keqes së implementuar nga Berisha në drejtësi, në administratë, në polici dhe në të gjitha “arteriet” e shtetit shqiptar.

Nëse mandatin e parë e kishte “penguar tepsia” e LSI, kur kemi hyrë në vitin e dytë të mandatit të dytë, me sa duket Ramën po e “pengon tepsia” e tij, dhe e ka kapur keq sindromi i mandatit të dytë, sindrom dyzimi i qeverisjes “kaluar”, madje duke “rrëmbyer” nga kampi kundërshtar.

Rama jo vetëm që nuk futi në burg Berishën dhe ministrat e tij të korruptuar, duke përdorur si argument në fillim mungesën e reformës në drejtësi dhe tani vonesën e saj, por po i “amniston” një nga një ‘dishepujt’ e Berishës që e groposën shtetin dhe që vendin e kishin në burg.

Kështu, te paratë Edi Rama me firmën e tij dhe kur kishte me qindra të tjerë për të zgjedhur nga PS dhe nga shoqëria civile, dërgon si përfaqësues të qeverisë socialiste për anëtar të Këshillit Mbikqyrës të Bankës së Shqipërisë, pikërisht rrënuesin e bankave përmes Piramidave mashtruese dhe zhytjes së vendit në borxhe, Ritvan Boden.

Duke imituar deri në detaje Sali Berishën që zgjidhte njerëz me “cene” në postet më të rëndësishme për të bërë punët e tij të pista, dhe Edi Rama dërgon ish ministrin e Financave të Berishës pikërisht te paratë, Bankën e Shqipërisë, për të mbuluar masakarallëqet e tij.

Ndërkohë që jo më larg se sot ka emëruar në krye të Drejtorisë së Krimeve të Rënda në Policinë e Shtetit Tonin Vocajn, i cili dhe në kohën e Berishës ka pasur pikërisht këtë detyrë.

Nënvizojmë se në përbërje të grupit “çiftelia” Tonin Vocaj darkonte me Agron Kuliçin, ish zv.drejtorin e Policisë së Shtetit dhe ish badigardin e Sali Berishës, në praninë dhe të Arben Frrokut, personit që disa ditë më vonë do ta akuzonin për vrasjen e kryekomisar Dritan Lamajt.

Pas kësaj darke vritet kryekomisari Lamaj dhe në burg përfundon Arben Frrokaj, i cili pas një manovrimi juridik me mbështetje politike arriti të lirohej nga burgu dhe të ikte jashtë vendit, për t’u tradhëtuar nga një ish pjestar i grupit “çiftelia”, Nikolin Thana, dhe arrestuar në Holandë.

Thana, lajmëroi Berishën, “bukën e vjetër”, i cili dekonspiroi vendndodhjen, ndërsa organet ligjzbatuese holandeze e arrestuan dhe tashmë po e gjykohet në gjendje arresti, pa i dhënë shtetit shqiptar të drejtën që ta ekstradojë dhe gjykojë në Shqipëri.

Ndërkohë, Tonin Vocaj, ky kamikaz i Berishës, ishte njeriu që mbylli vrasjen e Kosta Trebickës, që rrezikonte të dekonspironte dhe nxirrte fakte e prova kundër Shkelzen Berishës për përzierjen  e rëndë të tij në aferën e municioneve në punishten e Gërdecit.

Kosta Trebicka u gjet i vdekur në mes të fushës në Korçë, teksa kishte shkuar për “gjueti” në kulmin e përplasjeve, intervistave dhe kërcënimeve me familjen Berisha, me kafkë të shtypur por pa gjak dhe me një gjah shpend (shapkë Myzeqeje), të “vrarë” në Korçë.

Në vendngjarje të parët që arritën nga Tirana ishin zëvendësdrejtori i Përgjithshëm i Policisë së Shtetit Agron Kuliçaj si dhe Tonin Vocaj, atë kohë në krye të Drejtorisë së Luftës ndaj Krimeve të Rënda. Ata u dërguan nga ish ministri i Brendshëm Bujar Nishani, në emër të kryeministrit të atëhershëm Sali Berisha.

Kuliçi e Vocaj shkuan të parët në vendngjarje, si kamikazë të Berishës, e me sa duket zhdukën të gjitha provat e mundshme dhe njëherësh përgatitën kufomën e Trebickës për ta paraqitur si aksident. Megjithëse në Korçë i ndjeri Kosta Trebicka kishte mbërritur në “gjueti” i ngrirë.

Sipas ekspertizës, kishte shpëtuar ky detaj, në vendngjarje nuk i gjend asnjë pikë gjak, dhe rezultonte të ishte mbytur. Mbërriti më vonë dhe prokurori Sokol Stojani, i cili mori në dorë dosjen e trafikut të fishekëve, për të cilën kishte dëshmuar Trebicka.

Çështja u mbyll që në gjenezë nga grupi “çiftelia” i përbërë nga Agron Kuliçi dora e fortë e Berishës në polici asokohe, Tonin Vocaj që ishte në krye të krimeve të rënda në polici, dhe ku të dy bashkë e kopsitën ngjarjen si “aksident”. Por, menjëherë pas mbylljes së kësaj çështjeje me arkivimin si aksident të vdekjes së Trebickës, filluan shpërblimet për ata që zhdukën provat.

Drejtues i Parë Tonin Vocaj, u emërua Drejtor i Policisë së Qarkut të kryeqytetit. Vendin e lënë vakant nga Tonin Vocaj në krye të Drejtorisë së Luftës ndaj Krimeve të Rënda e zuri Drejtues i Parë, Nikolin Bala, pjestar tjetër i grupit “Çiftelia”.

Ndërkohë që tani Edi Rama e emëron Tonin Vocajn sërish Drejtor të Krimeve të Rënda në Policinë e Shtetit, duke bërë “amnistinë” e radhës për njerëzit e Berishës, që nuk kanë qënë thjeshtë dhe vetëm shërbëtorë të ish kryeministrit demokrat, por kanë mbuluar dhe vrasje me urdhër të tij, thjeshtë dhe vetëm për shpëtuar familjen e tij.

Me këtë veprim që bëri Rama jo vetëm që nuk ka ndërmend të lejojë zbardhjen e “Gërdecit” që ndodhi për shkak të makutërisë së djalit të Sali Berishës për t’u pasuruar sa më shpejt, dhe që shkaktoi 26 viktima të pafajshme e plagosi mbi 300 të tjerë, por aktorët kryesorë po i kthen në postet që kanë pasur. Nuk dihet nëse Rama ka hall apo kërkon të bashkëqeverisë me Berishën./Pamfleti