DEKLARATAT E NDËRKOMBËTARËVE, BASHA: S’MË INTERESON FARE PO TË THEM! VETËM QEVERI TRANZITORE, PA EDI RAMËN

Kreu i Partisë Demokratike Lulzim Basha, në një prononcim për media pas takimit me delegacionin e 7 eurodeputetëve të Parlamentit Europian, tha se nuk komenton dhe nuk i interesojnë deklaratat e ndërkombëtarëve lidhur me qëndrimin kundër bojkotit opozitar.

“Unë nuk merrem me komente të deklaratave të misioneve të huaja. S’më intereson fare po të them. Kjo qeveri ka marrë peng fatet e shqiptarëve me niçet e krimit dhe po rrezikon edhe stabilitetin e rajonit”, deklaroi Basha.

Krah aleatëve opozitarë në Selinë Blu, Basha tha se nuk ka asnjë tentativë për negociata me kryeministrin Edi Rama.

“Nuk ka asnjë komunikim midis meje dhe Edi Ramës, komunikimi im i vetëm është ai me qytetarët shqiptarë”, u shpreh kryedemokrati Basha duke vijuar të shpjegojë se e vetmja rrugë për zgjidhjen e krizës politike në vend është “qeveria tranzitore”.

“Pati interes për mënyrën se si një nga hapat e rëndësishëm për të dalë nga kriza është qeveria tranzitore, e cila ka dy detyra, të distancohet nga krimi i organizuar dhe të luftojë krimin e organizuar si dhe t’i zgjidhë duart prokurorisë për të hetuar.”

Basha nuk ngurroi të përmendë edhe emrat e socialistëve të rëndësishëm, që sipas tij janë të lidhur me krimin dhe duhet të dalin përpara drejtësisë, ndër ta Basha përmendi edhe një emër të ri, Safet Gjicin.

“Dosja 339 është maja e ajsbergut që tregon se si Edi Rama kapi zgjedhjet e lira. E vetmja mënyrë është qeveri tranzitore pa Edi Rama. Të gjithë këta që janë kapur, janë përgjuar me krimin, nga Vangjush Dako te Safet Gjici dhe Taulant Balla të shkojnë para drejtësisë”, u shpreh kreu i PD-së Basha.