Gjermani shuplakë PD: “Do mbani përgjegjësi disa vite”

Ambasadorja e Gjermanisë në Tiranë, Susanne Schütz, në një deklaratë të shpërndarë pak momente më parë, e ka quajtur të gabuar vendimin e opozitës për djegien e mandateve.

Schütz shprehet se çdo deputet e merr këtë vendim në mënyrë individuale dhe mban përgjegjësi për këtë para së gjithash përpara zgjedhësve të vet, ndërkohë që u ka bërë thirrje gjithë partive politike që opinionet e tyre ti përballin në Parlament.

Gjithashtu ambasadorja shton më tej se duke pasur parasysh vendimmarrjen e BE-së për nisjen e bisedimeve të anëtarësimit me Shqipërinë, nuk ka kohë për të humbur, në mënyrë që reformat të vijojnë dhe të arrihen rezultate konkrete.

DEKLARATA E PLOTË E AMBASADORES SË GJERMANISË SUSANNE SCHÜTZ:

Unë po i ndjek me shqetësim të madh zhvillimet aktuale. Jam e bindur se bojkoti i parlamentit apo dorëzimi i mandateve janë një rrugë e gabuar. Gjithsesi çdo deputet e merr këtë vendim në mënyrë individuale dhe mban përgjegjësi për këtë para së gjithash përpara zgjedhësve të vet. Por në interes të Shqipërisë unë u bëj thirrje të gjitha forcave politike që ndryshimet në opinione t’i përballin në formën e një dialogu konstruktiv në parlament. Duke mbajtur në vëmendje vendimmarrjen e BE-së për nisjen e bisedimeve të anëtarësimit me Shqipërinë duhet thënë, se nuk ka kohë për të humbur, në mënyrë që reformat të vijojnë dhe të arrihen rezultate konkrete.

Dhuna, sikurse e pamë të shtunën e kaluar, është e papranueshme. Në këtë kontekst u bëj thirrje të gjithë pjesëmarrësve të japin kontributin e tyre, që protestat e ardhshme të zhvillohen në mënyrë paqësore. Edhe ata që organizojnë protestën mbajnë përgjegjësi, që situata të mos përshkallëzohet. Në këtë pikë ndaj të njëjtin qëndrim me Presidentin Meta në deklaratat pas bisedës së tij me Presidentin Federal Gjerman Steinmeier.