I pari që merr përgjegjësinë pas dorëheqjes së opozitës, Gjergj Bojaxhi pranon mandatin e deputetit

Pas djegies së mandateve të opozitës, Kuvendi i bëri kërkesë KQZ-së për zëvendësimin e deputetëve.

Duke qenë se kryetarët e opozitës së bashkuar kanë deklaruar se as anëtarët në listat zgjedhore nuk do ta pranojnë mandatin, automatikisht zëvendësimi i deputetëve shkon te partitë e vogla, ndër të cilat edhe partia ‘Sfida për Shqipërinë’.

I ftuar mbrëmë ne emisionin ‘Top Talk’ me gazetarin Denis Dyrnjaja, ish-kryetari i partisë ‘Sfida për Shqipërinë’, Gjergj Bojaxhi e ka cilësuar vendimin e opozitës të paprecedentë.

Boxhi deklaroi se nëse atij do t’i vijë radha do të pranojë me kënaqësi të bëhet pjesë e Parlamentit.

Denis Dyrnjaja: Pas dorëzimit të mandateve të opozitës, duket se skenarë të rinj do të lindin dhe në renditje ka edhe parti të tjera që nuk janë pjesë e kësaj opozite, por që kanë qenë në opozitë. Përmendim këtu partinë Libra, apo atë Sfida. A do të futet në Parlament Bojaxhi, nëse i vjen radha?

Gjergj Bojaxhi: Çdo podium që ne mund ta përdorim për t’u dëgjuar më shumë nga qytetarët shqiptarë, për të denoncuar më shumë korrupsionin, nepotizmin dhe çdo gjë që shkon keq në këtë vend, unë mendoj – nuk dua të flas në emër të Sfidës sepse nuk jam kryetar i saj, – që një parti si Sfida duhet ta përqafojë këtë mundësi për të denoncuar dhe diskredituar gjithçka shkon keq. Pavarësisht se, nëqoftëse ne pranojmë rregullat e lojës në politikën që kanë ndërtuar këto dy partitë kryesore, nëse merr mandatin i bie që je patericë e qeverisë, nëse nuk e merr mandatin je palë me Lulin dhe Monikën. Në zgjedhjet e vitit 2017, pa u bërë marrëveshja PD-PS, ne si lëvizje politike hymë qartazi në garë pa bërë koalicion me asnjë nga partitë parlamentare, duke thënë se do t’i bënin opozitë këtij sistemi parlamentar dhe politik të krijuar në Shqipëri. Në këtë këndvështrim, çdo mundësi që do të na jepej, të paktën mua personalisht, për të goditur të keqen që është ndërtuar, do ta bëja me shumë kënaqësi.

Gjithashtu Bojaxhi theksoi se PD, LSI dhe aleatët e tjerë vetëm një pjesë e kandidatëve e kanë djegur mandatit dhe ka shanse që të tjerët të mos bien dakord me këtë vendim dhe të bëjnë opozitë në Parlament.