Krizë ushqimi, Koreja e Veriut i kërkon ndihmë OKB-së

Koreja e Veriut i ka kërkuar ndihmë Organizatës së Kombeve të Bashkuara për të përballuar krizën e ushqimit në vend, për shkak të rënies së prodhimit të grurit, orizit dhe patateve.

“Qeveria koreano-veriore i ka kërkuar ndihmë organizatave humanitare ndërkombëtare”, ka shpjeguar nga selia e OKB-së Stephane Dujarric, duke shtuar se agjencitë e OKB-së po diskutojnë me Penianin se si të përballojnë situatën.

Rreth 10,5 milionë koreano-veriorë, shifër e barabartë me 41% të popullsisë totale, kanë nevojë për ndihma elementare në ushqim dhe veshmbathje. Apeli i Koresë së Veriut vjen në vigjilje të takimit të dytë mes Kim Jong-un dhe Donald Trump, i parashikuar në datat 27 dhe 28 shkurt në Hanoi, në Vietnam.