Rama SMS çdo deputeti: “Mos replikoni me loqet e PD. Ata po shkrihen dhe s’janë më opozitë”

Kryeminstri Edi Rama u ka kërkuar mbrëmjen e sotme deputetëve socialistë që të mos u përgjigjen akuzave të opozitës, menjëherë pas deklaratës së Bashës për arrestimin shumë shpejt të kryebashkiakut Vangjush Dako.

Në mesazhin dërguar deputetëve, Rama u kërkon të vetëve që të mos replikojnë në distancë me deklarata e përgënjeshtrime ndaj akuzave e shpifjeve të pafundme të opozitës.

Kryeministri ka shtuar gjithashtu se e gjithë vëmendja e tyre do të jetë për njerëzit dhe me njerëzit.

‘Në vijim të komunikimit për refuzimin e daljeve me kolegët tanë të arratisur, në debate shterpë të cilat përveçse harxhojnë kot kohën e publikut, derdhin baltë e helm në tryezat e shqiptarëve, më duhet të shtoj se nuk do të replikojmë më në distancë me deklarata e përgënjeshtrime ndaj akuzave e shpifjeve të tyre të pafundme.

E gjithë vëmendja jonë do të jetë tek njerëzit e zakonshëm pa dallim dhe komunikimi ynë do të jetë për ta e me ta. Natyrisht nuk do t’i kursejmë as arratiakët në komunikimet tona, por vetëm kur kjo i duhet komunikimit me qytetarët. Le të merren kadrinjtë e kazanët me dokrrat e dëshpërimit të tyre dhe le të vlojnë së bashku në zjarrin e mandateve të tradhtuara! Koka bën koka pëson, megjithëse në rastin e tyre koka e bën dhe trupi si gjithnjë e pëson’, shkruhet në SMS e dërguar nga Rama.