Rrëzohet ashensori i një pallati, shpëton 24-vjeçarja

Një 24-vjeçare ka shpëtuar për mrekulli, pasi ashensori i një pallati në rrugën ‘Don Bosko’ në kryeqytet është rrëzuar nga kati i parë në bodrum.

Burime nga policia e Tiranës thanë se për pasojë e këtij aksidenti, vajza e re ka pësuar disa lëndime dhe është transportuar menjëherë në spital për kujdes mjekësor.

Të njëjtat burime sqarojnë se ngjarja ka ndodhur të hënën, rreth orës 16:25 dhe në momentin e aksidentit brenda ashensorit ndodhej vetëm 24-vjeçarja.

Një numër i lartë problemesh është raportuar me funksionimin e ashensorëve në kryeqytet, kujtojmë se dy vjet më parë një 29-vjeçare humbi jetën si pasojë e zjarrit që ra në ashensor.

Shërbimi zjarrfikës deklaron për Opozita.com se rastet e ndërhyrjes së tyre gjatë bllokimit të ashensorëve janë të shumta, ndërsa theksojnë se në rast të një situate të ngjashme; qytetarët duhet të ruajnë qetësinë, të mos krijojnë panik, të mos shtypin butonat e panelit të ashensorit, por vetëm atë të alarmit.