Taksa për rrjetet sociale, miliona përdorues më pak të internetit

Shteti afrikan i Ugandës është i pari që ka aplikuar taksën për përdorimin e rrjeteve sociale dhe për transfertat online të parave. Por rreth tetë muaj pas aplikimit të kësaj takse, 2,5 milionë qytetarë të Ugandës kanë hequr dorë nga përdorimi i rrjeteve sociale, shkruan “The Guardian”.

Nga muaji korrik i vitit 2018, në Ugandë të gjithë ata që duan të përdorin rreth 60 platforma online, mes të cilave Facebook, WhatsApp apo Twitter, duhet të paguajnë 200 shilinga ugandeze në ditë (rreth 5 cent).

Taksa u vendos për të rritur të ardhurat publike dhe presidenti i vendit Yoweri Museveni e konsideroi si një mjet për të luftuar “lajmet gossip online”. Uganda është një shtet me 44 milionë banorë dhe të ardhura rreth 2300 dollarë për frymë.

Rasti i Ugandës është një përgjigje për të gjithë ata që mendojnë se me anë të një takse mund të rregullohet përdorimi i rrjeteve sociale. Aplikimi i taksave, sidomos në vendet e varfra apo ato në zhvillim, mund t’u heqë qytetarëve të drejtën e informimit dhe të komunikimit online.