A u mor peng Dritan Leli nga i dënuari për vrasje?

Ish-kryeministri Sali berisha denoncoi këtë të hënë se kryebashkiaku i Vlorës ishte marrë peng. Sipas një mesazhi, nga një denoncues dixhital thuhej se Kryetari i Bashkisë, Dritan Leli ishte marrë peng në zyrën e tij me pistolete në koke nga Beni i Nazmies (Arben Licaj i dënuar me parë për vrasje). Po sipas denoncimit, Arben Licaj më pas ka kërcënuar edhe tre juristet e bashkisë.

“Çështja ka të bej me pallatin që ka bërë Beni Nazmies, të cilin Dritan Leli bashkë me vëllain e tij Eduard Leli duan t’ja prishin dhe t’ja japin tokën për pallat Julian Metushit një kapobande tjetër në qytet. Dritan Leli detyron juristët të firmosin dhe ata nuk pranojnë, pasi nga njëra ane ata janë të frikësuar nga Beni Nazmies dhe nga ana tjetër se do humbin vendin e punës. Juristet e bashkisë kanë denoncuar në polici dhe nuk e kuptoj pse policia nuk po lëviz dhe pse e mban te fshehur”, theksohej në mesazhin që publikoi Berisha.

Nga ana tjetër ka reaguar dhe Kryebashkiaku i Vlorës, Dritan Leli, i cili i është përgjigjur interesit të gazetarëve.

“Në fakt unë jam në qytetin e Vlorë, me sa duket Saliu ka filluar të kujdeset edhe për mua. I këshilloj të merret me fëmijët e tij, të mos trembë fëmijët e mi. Unë jam shëndoshë e mirë, vazhdoj të punoj me miq shumë të mirë. Nuk arrijnë dot tek Dritan Leli njerëzit e tillë për të cilët shkuan Berisha”, tha Leli.