Blogerja angleze: Po më dëbojnë nga Shqipëria, 6 muajshe shtatzënë

Gazetarja  britanike, Alice Elizabeth Taylor, ka denoncuar autoritetet shqiptare se i kanë mohuar lejen e qëndrimit në Shqipëri. Siç tregon ajo, fillimisht i kishin thënë se rezidenca i ishte pranuar, ndërkohë që lajmi se duhet të lërë vendin tonë i vjen në një kohë që ajo është 6 muajshe shtatzënë me të fejuarin e saj shqiptar, Ergys Hoxha.

Vetë blogerja angleze që u bë e njohur në vendin tonë me një shkrim ku rendiste 28 veset e shqiptarëve, e lidh këtë vendim të shtetit shqiptar me artikujt kritikë që ajo ka shkruar ndaj situatës së fundit politike në Shqipëri. Taylor raportoi edhe për televizionin rus “Russia Today” lidhur me protestat e opozitës.

“Qeveria shqiptare, pasi më ka sulmuar mua dhe partnerin tim për shkak të punës sime si gazetare dhe kritikave të mia ndaj tyre, tani ka anuluar rinovimin e lejes sime të qëndrimit. Pra, jam këtu në mënyrë të paligjshme dhe më kërkohet që të largohem, pavarësisht se kam një certifikatë mjekësore ku thuhet se nuk mund të udhëtoj për shkak të komplikimeve që mund të më dalin nga të qenit gati 6 muaj shtatzënë. Pres një fëmijë shqiptar”.

Ndërkohë Ergys Hoxha, i fejuari i Tayler, ishte një ndër personat e proceduar nga policia për protestën e 26 shkurtit.