FTOI RAMËN NË EMISION, LUBONJA: ISHTE TURPI I TURPIT TË BRUNO VESPËS

Analisti Fatos Lubonja i ftuar në rubrikën ‘Opinion’ në News 24 ka komentuar shfaqjen e kryeministrit Rama në emisionin ‘Porta a Porta’ të Bruno Vespës.

Sipas Lubonjës, nëse publiku italian donte me të vërtetë të dinte se çfarë po ndodh në Shqipëri, të vinin  gazetarët italianë dhe ta shikonin nga afër situatën, jo të shkonte kryeministri e të përpiqej të rregullonte imazhin e Shqipërisë.

Ndër të tjera analisti tha se  askush nga të ftuarit nuk përfaqësoi Shqipërinë dhe e cilësoi shfaqjen e mbrëmshme të Ramës si turpin e turpit të Bruno Vespës.

‘Vespa nuk njihet në Itali si ata që thonë të vërtetën, por si shërbëtor i regjimit të Berluskonit. Sado që e kam ndjekur prej kohësh Italinë edhe Vespën ajo që pashë dje i kalonte caqet e imagjinatës sime. Edhe në Shqipëri edhe gazetarët me shërbëtorë bëjnë kujdes të ftojnë në studio jo vetëm njerëz që mbështesin njërën palë, por edhe palën e kundërt, ndërkohë që ai kishte ftuar Ramën dhe tre personazhe, ku njëri ishte gazetari i Liberos që s’dinte asgjë nga Shqipëria, i dyti Igli Tare që është futbollist dhe s’ka jetuar fare në Shqipëri, aq më tepër që njihet si njeri i afërt me Ramën dhe i treti një sipërmarrës edhe ai i panjohur. Mua më bëri përshtypje që mungonte publiku shqiptar, mungonte një intervistë me njerëzit, një zë i paanshëm, s’po them politik por mungonte gjithçka. Ishte qartazi një gjë si mund ta thuash: e blerë! Ndoshta jo me lekë por me influenca. Ishte turpi i turpit të Bruno Vespës, ndaj besoj edhe e kishte futur në pjesën e fundit. Kryeministri i një vendi në vend që të ketë 15 minuta në orën kryesore, futet atje në fund pas debateve të rëndomta të ditës, kjo ishte e neveritshme. Nëse duan të mësojnë ç’ndodh këtu le të vijnë gazetarët italianë, por jo të niset kryeministri nga Shqipëria për të sqaruar çfarë ndodh këtu dhe për të rregulluar imazhin e Shqipërisë’, tha Lubonja.