Hillary Clinton tregon a do të kandidojë sërish për presidente të SHBA-së

Ish-sekretarja e shtetit njëherësh kandidatja që sfidoi Donald Trumpin në zgjedhjet e fundit presidenciale në SHBA, Hillary Clinton, ka hedhur poshtë mundësinë e kandidimit të saj në zgjedhjet e 2020-ës. Teksa ka folur në një intervistë për televizionin amerikan “News 12” ndër të tjera ish-sekretarja e shtetit të SHBA tha:

“Nuk do të kandidoj, por do të vazhdoj ta mbroj atë çfarë besoj. Nuk shkoj askund. Ajo që është në lojë në vendin tonë, ajo që po ndodh në këtë moment, më trishton”

Ish-zonja e parë e Amerikës pohoi se ka takuar demokratët të cilët synojnë të hyjnë në garën për Shtëpinë e Bardhë në vitin 2020.

“Çdonjërit prej tyre i kam thënë të mos e marrin këtë lehtë, pavarësisht se kemi një listë të gjatë të problemeve reale dhe premtimeve të cilat nuk janë përmbushur nga kjo administratë, që kërkojnë të theksohen”, ka shpjeguar Clinton.