Krijimet e fundit të Karl Lagerfeld, sfilata madhështore e Chanel

Këtë mëngjes “Chanel” priti mysafirët e saj në sfilatën e zakonshme “të një përralle dimri” me koleksionin e veshjeve vjeshtë-dimër 2019-2020. Këtë herë pasarela u shoqërua me emocione të forta, sepse u prezantua koleksioni i fundit i stilistit të ndjerë Karl Lagerfeld.

Në nder të stilistit, i cili u nda nga jeta dy javë më parë, në fillim të shfaqjes u mbajt një minutë heshtje. Madje një pjesë e modeleve nuk arritën të mbanin as lotët gjatë parakalimit me veshjet e tij.

Të gjithë të ftuarve ju dhurua një ilustrim i Karl dhe Coco Chanel me mesazhin “Puna vazhdon”, për të treguar se brezat e rinj do të vazhdojnë të ruajnë atë që ndërtuan dy ikonat e modës.

Sipas raporteve të fundit nga brenda shtëpisë së modës, Lagerfeld e dinte se po vdiste kur planifikoi këtë shfaqje së bashku me Virginie Viard, krahun e tij të djathë , tani trashëgimtare e mantelit të tij.

Modelet u shfaqën me veshje voluminoze ku ngjyra e bardhë dhe kuadrat kryesonin. Pantallonat serioze, këmishat dhe xhaketat duket se dhe këtë vit do të vazhdojnë të kryesojnë në botën e modës.