Nesër 4 deputetë të rinj në kuvend/ Çfarë do të ndodhë në protestë?

Dy ngjarje kanë ndodhur paralelisht: Pas kërkesave të shumta shumica parlamentare e shpalli orën e mbledhjes së kuvendit, e cila do të jetë të martën në mëngjes në ora 10:00, ndërsa menjëherë pas kësaj opozita jashtë parlamentare ka shpallur mbajtjen e një tubimi që ashtu siç e ka paralajmëruar do të bëhet sa herë të mblidhet ai që PD e LSI tashmë e konsiderojnë si parlament ilegjitim.

Por, krahas këtyre vendimeve politike po merren masa edhe për detajet teknike. Duke qenë se këtë të martë situata do të jetë edhe më e tensionuar për dy arsye, së pari se aty për herë të parë do të betohen 4 deputetë dhe së dyti sepse policia nuk ka miratuar mbajtjen e tubimit, palët po hartojnë stratejitë e tyre. Në mbledhjen e grupit parlamentar të socialistëve është marrë vendim që deputetët të jenë që në ora 9:30 minuta në sallë në mënyrë që ata të mos pengohen nga protestuesit. Në po të njëjtën mbledhje ministri Sander Lleshaj u ka garantuar deputeteve hyrje te sigurt ne seancë. Ndërkohë që kryeministri Edi Rama ka kërkuar të mos ketë skena si ato që ndodhën javën e shkuar, në protestën që u shoqërua me dhunë mes policisë dhe protestuesve.

Por me tu njohur me këto manovra të kundërshtarit, opozita ka bërë thirrje që përkrahësit e saj ta rrethojnë që në ora 09:00 parlamentin, në mënyrë që deputetët ose të mos lejohen të hyjnë ose të njollosen si në rastin e ministrit Klosi dhe deputetit Sterkaj, një javë më parë. Dhe këtë herë PD duket se e ka seriozisht. Ajo i ka bërë thirrje edhe militantëve nga rrethet të mblidhen në Tiranë, ndërsa nënkryetari i kësaj partie Edi Paloka ka deklaruar se nuk është mirë që inidiferentët të “guxojnë” të afrohen pranë kuvendit.

“Do jemi ca me shume kete here dhe pak me “te gjalle” se ai gazi na ka ngacmuar ca nerva qe na kishin mbetur te fjetura. Kam nje thirrje vetem per ata qe kur njerzit protestojne, kane qejf te sodisin nga televizionet e kafeneve; ne se nuk vini ne proteste po per arsyet tuaja keni qejn te rrini ne kafe, zgjidhini kafet sa me larg…”

Por nga ana e saj edhe policia po merr masat për këto paralajmërime. Mjedisi rreth sallës është mbushur tashmë me kamera dhe krahas polisicë aty do të jenë të gatshme edhe trupat speciale. Kjo e ka bërë Lulzim Bashën të deklarojë se përpos policisë qeveria ka thirur ne ndihmë edhe trupa të ushtrisë të maskuar si policë ndërsa Sali Berisha ka denoncuar ngritjen e postblloqeve policore në të gjithë vendin nga drejtori i policisë Ardi Veliu.

Deri më tani me sy shikohen vetëm gardhet e vëna rreth kryeministrisë dhe në të gjithë lulishten para Piramidës gjë që tregon se Rama i trembet edhe një sulmi drejt kryeministrisë pas tubimit para parlamentit.

Deri më tani asnjë nga palët nuk e përjashton dhunën si mjet në përplasjen e njerzve dhe i vetmi debat po bëhet nëse duhet përdorur apo jo më gazi lotësjellës që ka shpërndarë turmën në dy protesta. Pas lëshimit të tij policia u akuzua se po jep përgjigje të shproporcionuar ndaj revoltës opozitare gjë që bie ndesh me rezolutën e parlamentit europian mbi protestat violente.