Nga Lezha në Gramsh, policia arreston 8 protestues

Si edhe në protestat e mëparshme, policia ka arrestuar disa qytetarë që morën pjesë në protestën e sotme tek parlamenti. Janë 8 persona të arrestuar,  9 të tjerë do të ndiqen në gjendje të lirë. Policia ka publikuar inicialet dhe origjinën e tyre, ku shihet se protestuesit e arrestuar  janë nga qytete të ndryshme të Shqipërisë. Po kështu, policia thotë se “Organizatorët e tubimeve (PD-LSI) janë përgjegjës për plotësimin e kushteve që parashikon ligji për protestat.

Në deklaratë thuhet:

“Gjatë tubimit, pjesëmarrësit kanë kundërshtuar, goditur me mjete të forta e lëndë plasëse (gurë, shkopinj, fishëkzjarre etj.) punonjesit e Policisë, të planizuar me shërbim në ambientet përreth Kuvendit të Shqiperisë

Pas analizimit të pamjeve filmike, raport-shërbimeve dhe provave të tjera të mbledhura gjatë protestës është bërë arrestimi në flagrancë për kryerjen e veprave penale “Organizimi dhe pjesëmarrja në grumbullime e manifestime të paligjshme”, “Kundërshtimi i punonjësit të policisë së rendit publik”, “Goditje për shkak të detyrës” dhe “Prishja e qetesisë publike”, i 8 shtetasve:

 N.C., 36 vjeç, banues ne Sukth, Durres (i denuar më parë për vjedhje dhe drejtim mjeti pa leje drejtimi);
– A. M., 23 vjeç, banues në Tirane (i denuar më parë për vjedhje);
– E. C., 33 vjeç, banues në Burrel;
– L.D., 37 vjeç, banues në Burrel (i denuar më parë për vjedhje);
– A.P., 23 vjeç, banues në Tirane;
– M. N., 31 vjeç, banues në Kamëz;
– L. B., 41 vjeç, banues në Gramsh;
– E.G. 36 vjeç, banues në Lezhë.

Janë proceduar ne gjendje të lirë për veprën penale “Organizimi dhe pjesmarrja në grumbullime e manifestime të paligjshme” edhe 9 shtetas të tjerë. Në cilësinë e provave materiale janë sekuestruar kapsolla, doreza, kapuç, maska, pjesë metalike, flakadanë, etj.

Policia e Shtetit përsërit thirrjen drejtuar organizatorëve të protestave, të distancohen nga elementët problematikë e me precedentë, që cënojnë rendin dhe sigurinë, duke sulmuar e goditur punonjësit e policisë si dhe tentojnë të cënojnë integritetin e incitucioneve shtetërore. Organizatorët e tubimeve janë përgjegjës për plotësimin e kushteve që parashikon ligji”, deklaron policia.