Së shpejti fluturimi Europë-Amerikë 30 minuta (Bileta 5.000 euro)

Një udhëtim nga Londra në Nju Jork do të merrte vetëm 29 minuta dhe më pak se një orë për të arritur në Sidnej me raketën SpaceX Starship të Elon Musk.

Lëvizja në destinacione të ndryshme në Tokë, por duke udhëtuar nëpër hapësirën ​​e jashtme të planetit, mund të ‘shkatërrojë’ tregun aktual për udhëtimet që zgjasin më shumë se 10 orë.

Firma zvicerane UBS parashikon se deri në vitin 2030 tregu i udhëtimeve me raketë do të arrijë një vlerë prej 19.7 miliardë $ në vit.

Kompania gjithashtu pretendon se industria e turizmit hapësinor do të ketë një vlerë prej 3 miliardë $ deri në vitin 2030.

E ardhmja e fluturimeve për distancat e gjata do të sjellë raketat, thanë ekspertët financiarë.

Udhëtime të tilla me shpejtësi të madhe në hapësirën e jashtme përfaqësojnë një treg shumë fitimprurës për të apasionuarit e SpaceX dhe Virgin Galactic, të cilët po konkurrojnë në turizmin hapësinor.

Jarrod Castle dhe Myles Walton, analistë pranë firmës UBS, thanë: “Edhe pse disa mund ta shohin si fantashkencë shfrytëzimin e hapësirës për të ofruar udhëtime për distancat e gjata, ne mendojmë se ekziston një treg i madh.”

Ndërsa turizmi hapësinor është ende në fazën e lindjes, ne mendojmë se, teksa teknologjia zhvillohet dhe kostot bien për shkak të saj dhe të konkurrencës, turizmi hapësinor do të bëhet më i zakonshëm.”

Për fluturime më të gjata, si për shembull nga Londra në Sydney, që aktualisht shkon deri në 23 orë, një raketë do të merrte më pak se një orë.

Ata thanë se turizmi hapësinor në hënë, në Mars dhe planete të tjerë gjithashtu do të bëhet realitet, me hotele në stacionet e hapësirës, të pështatura kushteve hapësinore.

Analistët parashikojnë se industria e hapësirës, e cila sot ka një vlerë rreth 400 miliardë $, do të rritet në 805 miliardë $ deri në vitin 2030.

Gara për kompaninë e parë që do të dërgojë pasagjerë në hapësirë ​​është duke u zhvilluar mes Sir Richard Branson të Virgin Galactic, themeluesit të SpaceX, Elon Musk, dhe CEO-s së Amazon, Jeff Bezos.

UBS parashikon se tregu është i madh, edhe pse me një përqindje të vogël të pasagjerëve që do të udhëtojnë me raketa për të shkuar nga një vend në tjetrin.

Në vitin 2018, rreth 150 milionë pasagjerë harxhuan më shumë se 10 orë në një fluturim të vetëm.

Raketat Starship të Elon Musk kanë një kapacitet për 100 persona, dhe madhësia e anijeve hapësinore mund të jetë një faktor kufizues për të ardhmen e parashikueshme.

UBS tha se nuk ka gjasa që çdo raketë do të mbajë mbi 300 njerëz, por fluturimet më të shpeshta mund ta zgjidhin problemin./Gazeta Liberale