Sulmi në Holandë, letra e gjetur në makinë pritet të zbardhë motivin

Prokurorët holandezë që po hetojnë vrasjen e tre personave në në një tramvaj  thonë se kanë gjetur një letër në makinën me të cilën u arratisën autorët, dhe kjo është një nga arsyet se pse një motiv terrorist po konsiderohet seriozisht.

Tre vetë u vranë dhe tre të tjerë u plagosën rëndë gjatë sulmit në qytetin e Utrehtit.

I dyshuari si autor i sulmit, Gokmen Tanis, i lindur në Turqi, u arrestua të hënën në mbrëmje.

Asnjë lidhje nuk është gjetur mes tij dhe viktimave. Prokurorët thonë se një armë zjarri u gjet kur Tanis u arrestua.

“Deri më tani një motiv terrorist po merret seriozisht në konsideratë. Ndër të tjera një letër u gjet në makinën e ikjes dhe po analizohet, “thanë prokurorët pa dhënë detaje mbi përmbajtjen e letrës.

Motive të tjera nuk janë përjashtuar. Automjet tip “Renault Clio” me ngjyrë të kuqe u vodh nga skena e sulmit dhe u gjet më vonë në Tichelaarslaan të Utrehtit, afër vendit ku u arrestua i dyshuari.

Fqinjët e kishin përshkruar më parë të dyshuarin si një “dështak” dhe një kriminel të vogël sesa një terrorist.

Zyrtarët holandezë të drejtësisë konfirmuan të martën se ai ishte liruar nga paraburgimi për një rast përdhunimi në korrik.

Ai u lirua pasi premtoi të bashkëpunonte me autoritetet.

Po kështu ai ishte dënuar dhe për krime të tjera gjatë këtij muaji dhe në të kaluarën.

Dy të dyshuar të tjerë janë në paraburgim, 23 dhe 27 vjeç, dhe autoritetet po vlerësojnë nëse kishin ndonjë përfshirje në sulmin e kryer.

Avokati i tyre u tha mediave holandeze se dy të rinjtë ishin vëllezër, por nuk kishin lidhje me të dyshuarin kryesor për sulmin.