Parlamenti grek në një mendje: Gjermania të paguajë dëmet e luftës

Greqia do të nisë një fushatë diplomatike për marrjen e miliarda eurove nga Gjermania, si dëmshpërblim për pushtimin nazist gjatë Luftës së Dytë Botërore. Propozimi u mbështet si nga anëtarët e qeverisë ashtu edhe nga ata të opozitës, duke marrë shumicën e votave në Parlament.

Një komision parlamentar i ngritur në vitin 2016 për këtë çështje, llogariti se dëmet që Gjermania i ka shkaktuar Greqisë i kalojnë 300 miliardë eurot. Gjithsesi, në votimin e së mërkurës nuk u përmend asnjë shumë konkrete që do të kërkohet si dëmshpërblim.

“Ky pretendim është detyra jonë historike dhe morale. Për të ndërtuar një të ardhme më të mirë ne duhet të mbyllim rastet e hapura të së kaluarës dhe Gjermania duhet të bëjë të njëjtën gjë”, tha kryeministri Alexis Tsipras, pas një diskutimi në Parlament që zgjati 12 orë.