Zbythet PD: Jemi të gatshëm për zgjedhjet e 30 qershorit për bashkitë

Ish deputetja e PD-së, Jorida Tabaku, deklaroi se opozita është gjithmonë e gatshme për zgjedhje, pasi tha se po punon edhe me programin krahas protestave.

“Partia Demokratike krahas protestave po punon edhe me programin por jo program lokal, program qendror që do të thotë ne jemi të gatshëm për zgjedhje. Por ju siguroj edhe nëse bëhen nesër zgjedhjet opozita del mazhorancë. Ka nisur edhe seleksionimi nëpër struktura”, u shpreh Tabaku, ndërkohë që pretendon se mazhoranca nuk ka për të hyrë në zgjedhje pa opozitën.

“Jam shumë e bindur që nuk ka për të pasur zgjedhje pa opozitën. Historia e ka treguar që nuk mund të ketë zgjedhje pa opozitën. Janë shtyrë zgjedhjet deri në gjetjen e një gjuhe. Kur Edi Rama ishte kryetar bashkie në Tiranë i shtyu zgjedhjet dhe kjo gjë u bë me vullnetin e mazhorancës asokohe. Është e vërtetë që kjo rrugë që kemi nisur nuk është e thjeshtë madje e dinim që në fillim. Por besoj që me kalimin e kohës gjithmonë e më shumë po ndryshon. Kjo për shkak të mbështetjes së madhe popullore”, tha Tabaku në emisionin “5 Pyetjet nga Babaramo” në Report Tv