Haradinaj-Metës: Rama të heqë taksën në Rrugën e Kombit

Kryeministri i Kosovës, Ramush Haradinaj, ka kërkuar që Shqipëria ta heqë taksën në “Rrugën e Kombit”.

“E lus presidentin t’i kërkojë Edi Ramës t’ia nisë prej hapit të parë. Ta heqë taksën, skanerin. T’ia nisim kështu bashkimin. Unë jam për një bashkim konkret e jo të fjalëve të mëdha. I kisha lutur të gjithë të bëjmë kujdes: Që të mos shkojnë fjalët para punëve”, – ka thënë Haradinaj në televizionin publik.

Tarifa e kalimit në rrugën Durrës-Kukës u vendos për herë të parë në fillim të muajit prill të 2018-s në masën 5 euro për një kalim ose 10 euro vajtje-ardhje.

Pas protestës së banorëve të Kukësit qeveria nisi bisedimet si me koncesionarin ashtu edhe me banorët për të gjetur një formulë të re.