KLSH apo qeveria, kush gënjen për borxhin publik të Shqipërisë?

Në studion e “Byro Politike” në ABC News, ekonomisti Selami Xhepa ka thënë se shifrat e përdorura nga qeveria për të treguar borxhin publik, janë të ndryshme nga ato të Kontrollit të Lartë të Shtetit. Sipas Xhepës, ky është një problem i rëndë që vë në pikëpyetje besueshmërinë e shifrave të përdorura nga qeveria. Ekonomisti sqaroi se Fondi Monetar Ndërkombëtar thotë për borxhin se është 3-4 për qind më i lartë nga sa raporton qeveria.

“Ka ndodhur një mashtrim statistikor, sepse qeveria ka deklaruar tjetër shifër për borxhin publik, dhe FMN del me një tjetër shifër që është 3 deri në 4 pikë më i lartë nga sa ka raportuar qeveria. Vetë Kontrolli i Lartë i Shtetit për herë të parë, si institucion përgjegjës për të audituar financat publike, del me një raport ndryshe ndërkohë që qeveria ka dalë me një raport tjetër. Pra hera e parë që vëmë në diskutim seriozitetin e shifrave me të cilat qeveria po i paraqitet publikut. Borxhi publik është në nivelet 70 % të PBB, si do realizohet konsolidimi fiskal?”, deklaroi Xhepa.