Komisioni i posaçëm për reformën zgjedhore, PD përgjigje Kuvendit

Partia Demokratike i është përgjigjur Kuvendit, i cili me anë të sekretarit të Përgjithshëm Genci GJonçaj i dërgoi të shtunën një letër, ku i kërkonte të caktonte një përfaqësues për në Komisionin e Reformës Zgjedhore.

PD në reagimin e saj thekson se vendi ka nevojë për një reformë të vërtetë zgjedhore, dhe se nuk pranon të dërgojë vëzhgues për reformën zgjedhore.

“Komisioni i reformës zgjedhore nuk ka legjitimitet. Refoma nuk mund të bëhet nga individë që duhet të ishin në burg për blerjen e zgjedhjeve.

Partia Demokratike nuk do të çojë vëzhgues në Komisionin për Reformën Zgjedhore, siç kërkoi Kuvendi pak ditë më parë. PD e konsideron komisionin e reformës zgjedhore, njësoj si Parlamentin, “pa legjitimitet dhe produkt të zgjedhjeve të diktuara gjerësisht nga krimi i organizuar dhe blerja e votave me paratë e pista të krimit”.

Në përgjigje të kërkesës së Kuvendit, Sekretari i Përgjithshëm Gazment Bardhi shprehet: “Asnjë Komision që ka në përbërje dhe drejtim individë që duhet të ishin në burg për krime elektorale, nuk gëzon legjitimitetin për realizimin e Reformës Zgjedhore. Asnjë Komision që ka në përbërje dhe drejtim individë që nuk përfaqësojnë opozitën, nuk mund të përcaktojë rregullat për pjesëmarrje në zgjedhje të partive politike opozitare.’

Duke ritheksuar nevojën për Reformë të vërtetë Zgjedhore, PD shpreh bindjen se ajo duhet të realizohet e të zbatohet vetëm nga institucione apo parti që kanë vullnet për të garantuar zgjedhje të lira dhe të ndershme.

“Personat, subjekt i hetimeve penale nr. 184/2016 apo nr. 339/1/2017 të Prokurorisë për Krimet e Rënda, janë në kushtet e konfliktit të interesit me zgjedhjet e lira dhe të ndershme, si dhe me Reformën e vërtetë Zgjedhore, për të cilën ka nevojë vendi.”– thuhet në përgjigjen e PD.