Llumi i kombit: Shporruni….

Janë të njëjtët individë, familje, grupe interesi, oligarkë e banda krimi, që nuk janë futur në politikë, për të fuqizuar ekonominë e Shqipërisë, apo për të integruar vendin dhe shqiptarët në BE, por për të bërë rotacione pushteti hajdutësh, si mundësi për të mbushur thasët, me miliarda nga pasuritë e taksat publike dhe për të ndarë e grabitur prona të çdo lloji, në bashkëveprim me njeri-tjetrin

Edhe në këto prag zgjedhjesh lokale, po dëgjojmë të njëjtat premtime, të bëra qysh prej 30 vite më parë, kur epoka e demagogjisë e izolimit të regjimit komunist, u zëvendësua e vazhdoi si skenar, me mashtrimet e (gjoja) demokracisë, që po prej kaq vitesh, po komandohet nga të njëjtët horra, si familje, fise, klane e banda politiko-kriminale.

Asnjë nga këto premtime e përbetime, që recitohen me “lotë në sy” nga politikanët në këto 30 vite tranzicion, nuk realizohet nga asnjë parti e qeveri, përkundrazi, ata që janë në pushtet vjedhin, ndërsa ata që vijnë pas tyre mbulojnë vjedhjet, pa bërë asnjë ndëshkim.

Faktet tregojnë, se në gjoja “luftë” me njeri-tjetrin ditën e në pazare natën, horrat e PS, PD e LSI, vazhdojnë sundimin, bizneset, bashkë-pushtetin, grabitjen e pasurive dhe mashtrimin e shqiptarëve, duke u pasuruar për 30 breza, ndërsa popullit i hedhin lëmosha me nga 2% e 5% rritje pagash, pensioni dhe ndihme ekonomike.

Shqiptarët që në vitin 1991, kanë qenë 20, 30, 40 e 50 vjeç, sot janë 50, 60, 70 e 80 vjeç, dhe përsëri, kanë në pushtet e politikë Saliun, Gramozin, Ilirin, Monikën, Edin, Lulzimin, Pollon, Tritanin dhe lukunitë e tyre partiake-mediatike, që trumbetojnë të njëjtat premtime të viteve 1991-1995.

Po kështu, ata që janë lindur në vitet 1991-1992, sot janë 27-28-vjeçar dhe bashkë me fëmijët e tyre (brezi i tretë), po dëgjojnë të njëjtat mashtrime, që u janë bërë prindërve e gjyshërve të tyre para 30 vitesh, për futje në BE, kthim prone, punësim, rritje page e pensioni, drejtësi të pavarur dhe… ujë 24 orë.

Ja 30 premtimet e njëjta, të përsëritura nga çdo kryetar partie, në çdo fushatë zgjedhjesh

  1. Do hapim negociatat me BE (premtim i çdo viti).
  2. Do krijojmë administratë me profesionistë, pa militantë partiakë.
  3. Do bëjmë pagat dhe pensionet, si në vendet e BE.
  4. Do krijojmë kushte të plota, që të votojnë emigrantët.
  5. Deputetët, kryebashkiakët dhe presidentin do t’i përzgjedh populli.
  6. Qeveria do përdorë 50% të taksave, për strehimin e familjeve pa banesa.
  7. Do hapen 100, 200, 300 mijë vende pune të reja.
  8. Çdo ligj dhe vendim qeverie, do kosultohet paraprakisht me popullin.
  9. Do miratojmë minumin jetik, me pagesë mujore si në vendet e BE.
  10. Do luftojmë dhe pastrojmë korrupsionin, në administratën publike.
  11. Brenda mandatit, do përfundojë legalizimi i ndërtimeve (prej 13 vitesh).
  12. Brenda mandatit, do kthejmë pronat tek pronarët legjitim (prej 28 vitesh).
  13. Shëndetësia do jetë falas, për çdo rast të rëndë, do bëhet kurim jashtë shtetit .
  14. Nuk do bëhet asnjë shitje pasurie kombëtare, pa u konsultuar me komunitetet.
  15. Arsimi në çdo nivel, do jetë falas duke nisur që nga librat.
  16. Pushteti lokal (bashkitë), nuk do marrin vendime pa miratimin e banorëve.
  17. Furnizimi me ujë do jetë 24 orë dhe i sigurtë nga ana shëndetësore.
  18. Do ndëshkohen ministrat, që kanë shkaktuar dëme ekonomike-financiare.
  19. Nuk do ketë më pagesa me fatura aforfe, për energjinë elektrike.
  20. Nuk do ketë më monopole në tregjet dhe shërbimet publike.
  21. Vendimi i parë i qeverijses, do jetë anulimi i të gjitha koncesioneve.
  22. Do seksutrohet çdo qindrakë, që u është dhënë oligarkëve.
  23. Nuk do ketë asnjë familjarë të politikanëve të lartë, në poste pushteti
  24. Brenda vitit, do eleminojmë bandat e krimit (premtim i përvitshëm).
  25. Do çojmë para drejtësisë, të gjithë gjyqtarët dhe prokuroët abuzues.
  26. Do ulim çmimet e karburaneteve dhe pesticideve për fermerët.
  27. Do çojmë para drejtësisë, të gjitha dosjet zyrtare korruptive.
  28. Do miratojmë Kartën e Studentit (në çdo fushatë lokale e parlamentare).
  29. bllokojmë dhe sekuestrojmë gjithë biuzneset e politikanëve të lartë.
  30. Do anulojmë të gjithë ligjet dhe VKM-të, që kanë cënuar interesat e popullit.

ÇUDIA VAZHDON/ Megjithëse shqiptarët e kanë kuptuar e provuar ashpërsisht në këto 30 vite, që mashtrohen, vidhen e tallen, vazhdojnë heshtin e shkojnë pas krerëve të partive, kryeministrave e ish-kryeministrave, ministrave e ish-ministrave hajdutë dhe deputetëve delenxhinj, matrapazë e mashtrues, duke i ndjekur në takime e mitingje, tamam si “kopetë e deleve”, të shënuara në ballë me ngjyrë mavi, blu e të kuqe, si shenja dalluese se cilit “stan e çoban” i përkasin./Pamfleti