Meta i revoltuar për krizën politike, tregon ku i ka rrënjët

Presidenti Ilir Meta gjatë fjalës së tij në konferencën e organizuar nga Shoqata George C. Marshall Shqipëri, me temë “Sfidat e Sigurisë në Ballkan dhe roli i aktorëve të jashtëm në kohën e tranzicionit euroatlantik” , foli paksa i indinjuar.

Presidenti foli për krizën politike, për “peshqit e mëdhenj”, reformën në drejtësi e shumë çështje të tjera.

Me një ton jo të ulët Meta tha: “Sot kemi një krizë mjaft serioze në Shqipëri të cilës nuk mund t’i shmangemi. Pasi vendi pësoi 1997, për fat të keq, u bë një Kushtetutë e jashtëzakonshme. Me ndihmën e ekspertëve më të mirë të komisionit të Venecias, u bë një kushtetutë për të parandaluar një tjetër ‘97. Në vitin 2008, mos harrojmë për dy ditë një kushtetutë e bërë me aq sakrifica u hodh poshtë”.

Ndërsa për tezat për bashkim të shqiptarëve në Ballkan Presidenti tha se janë delirime.

“Nuk ka komb në Ballkan që kanë përfituar më shumë nga rënia e perdes së hekurt, nuk ka komb në Ballkan që ka qenë më i shtypur para viteve ’90. E mbajmë mend shumë mirë se cfarë ishte Rumania e Jugosllavia, ne ishim thjesht një Kore e Veriut në atë kohë. Dëgjojmë shpesh, pse mos bashkohen të gjithë shqiptarët, po natyrshëm pse mos të bashkoheni kroatët, të gjithë boshnjakët etj.

Këto delirime janë një diabolizëm i gjallë, një pëpjekje e politikanëve për të provokuar tema, për të shmangur vëmendjen nga cështje të brendshme. Dhe shpesh e bëjnë këtë edhe në mënyrë të koordinuar. Dhe ndërkohë cfarë ndodh ikin të rinjtë, nga Kosova, Serbia maqedonia, ikin kudo dhe na ftojnë për të parë një film që e kemi parë kudo”, – u shpreh Presidenti.