Ndryshimet e reja në Kodin Penal! Kush rrezikon burg

Gjatë mbledhjes së grupit parlamëntar të PS-së, qeveria ka hedhur për diskutim ndryshimet që do të bëhen në Kodin penal, ku do të preken disa fusha. Sipas ndryshimeve të reja kush cënon sigurinë ushqimore do të dënohen me burg.

Kryeminsitri Edi Rama përmendi disa nga rastet, kur dënimi do të jetë deri në 10 vite burg.

“Ia kanë hedhur në 30 vjet me gjoba që s’janë asgjë, por kjo nuk do vazhdojë më kështu. Këto forca të së keqes që kërcënojnë shëndetin tonë dhe të fëmijëve tonë, do t’ju hiqet e drejta e lirisë së ushtrimit të aktivitetit dhe lirisë individuale”, paralajmëroi Kryeministri.

Një paralajmërim e bëri edhe për dhunuesit ndaj njerëzve që janë në krye të detyrës.

“Domosdoshmëria për një përgjigje të prerë ligjore mbi dhunën ndaj të zgjedhurve dhe funksionarëve, që nga salla e parlamentit deri në çdo metër katrorë të Shqipërisë, dhunën ndaj punonjësve të policisë që nga kundërshtimi me forcë deri tek prekja me gishtin e vogël të uniformës blu”, – tha më tej Rama.

Po me burg do të dënohet dhe dhuna ndaj bluzave të bardha, dhuna në aktivitete sportive.