Nga Xhovani SHYTI/ Hakmarrja e “rilindasve” të “Ed Rama Group”

 

E kisha dëgjuar nga  të tjerë por nuk e besoja, pasi më dukej si veprim shumë vulgar dhe i padenjë për ata që i kanë dhënë të drejtën vetes të mbajnë mbi shpinë “rilindjen” shqiptare.

Më kishin thenë se po të mos u vish pas avazit këtyre “rilindasve”, të cilët në anonimitet administrojnë grupin facebukist  ” Ed Rama Group”, ata të fshijnë nga qënia frends i tyre. Domethenë të bëjnë bllok.

Nuk të lejojnë të vijosh të hedhësh në faqen e tyre postime që “cënojnë” figurën dhe integritetin e liderit të tyre Kryerilindas, njëherësh dhe Kryeministër i qeverisë, me ambicie elektorale “rilindase”.

Më demek të bëjnë bllokadë, nëse ti rastis që një ditë të shprehesh jo dakort me politikat e qeverisë Rama, duke u rreshtuar në krah të popullit taksapagues.

Sikurse përmenda më sipër, kur m’i thoshin këto, jo vetëm nuk i besoja, por i kundërshtoja kolegët e mi, megjithse jo pak prej tyre nuk  janë të angazhuar me ndonjë krah politik.

Nuk i besoja pasi “çregjistrimi” përpara kauzës së tyre të madhe “rilindjes” është si pickima e mizës në prapanicën e kalit, mushkës apo gomarit…

Mirëpo qenkam gabuar.

Sepse gjema “rilindase” ndodhi edhe me mua, gazetarin që gjatë gjithë karrierës sime tre dekadëshe ka ndeshur në turli lloj hakmarrjesh për motive politike, por kurrë i ndëshkuar me “bllok” facebook-ist. Aq më tepër nga grupimi që epitetin optimisto-frymëzues “rilindje”, të premtuar gjatë fushatës si frymë ripërtëritjeje për Shqipërinë e trashëguar nga demokratikasit e Berishës, e shndërruan në nofkë përsëndytëse.

Hakmarrjen e sojit të “rilindasve” e ndesha pak ditë më parë. Saktësisht të Hënën e 29 Prillit 2019, njëzetë e katër orë pas postimit në faqen e  tyre “Ed Rama Group”, të shkrimit të mëposhtëm, që po ua sjell ta lexoni vetë, pa dashur të bëj vetëkomentim për të mos renë në konflikt interesi.

E vetmja gjë që po ju parathem është qënia e tij kundër qeverisë së “Kryerilindasit” dhe vendimit të KM, dt. 04 Prill ’09, mbi të cilin ngrihet e gjithë tema…