Nis vetting-u në polici, 45 punonjës nën “sitën” e vlerësimit

Komisioni i Jashtëm i Vlerësimit përzgjedh dosjet e para. Procesi, synon pastrimin nga të inkriminuarit dhe të paaftët

 Një vit pas miratimit të ligjit të vetting-ut në Policinë e Shtetit, procesi ka nisur zyrtarisht. 45 drejtuesit e parë, përfshirë edhe Drejtorin e Përgjithshëm, Ardi Veliu, do t’i nënshtrohen verifikimit të tri kritereve. Pastërtisë së figurës, aftësive profesionale dhe kriteri i pasurisë. Zyrat e Komisionit të Jashtëm të Vlerësimit janë vendosur pranë Gardës së Republikës. Tashmë po verifikohen dosjet e para dhe më pas do të nisin seancat dëgjimore me 31 drejtuesit e policisë, 12 punonjës të SHÇBA-së dhe 2 drejtues të lartë të Gardës së Republikës.

Procesi

Komisioni i Jashtëm i Vlerësimit ka përzgjedhur 45 emrat e parë që do t’i nënshtrohen procesit të vetting-ut në radhët e policisë. Dosjet e vetëdeklarimit janë tërhequr dhe ka nisur puna në fazën e parë. Sipas parashikimeve ligjore, do të mbahet për çdo subjekt seancë e hapur dëgjimore. Dosjet e vetëdeklarimit të drejtuesve të policisë janë tërhequr nga Komisioni i Jashtëm i Vlerësimit dhe ka nisur puna për shqyrtimin e deklaratave dhe verifikimet përkatëse. Si vetting-u në sistemin e Drejtësisë edhe ai i Policisë mbështetet në tri kritere: pastërtia e figurës, pasuria dhe tek aftësitë profesionale. Në fillim do të bëhet vlerësimi për 31 drejtues të lartë në Policinë e Shtetit. Nga Shërbimi për Çështjet e Brendshme dhe Ankesat, të parët do të kalojnë në sitë 12 punonjës dhe në Gardën e Republikës 2 drejtues. Në total do të kalojnë në filtrat e vetting-ut 13 mijë punonjës të Policisë së Shtetit. Godina është përcaktuar në ambientet e Gardës së Republikës dhe sipas ligjit, për çdo subjekt do të mbahet seancë e hapur dëgjimore.

Vlerësimi

Për vlerësimin e 250 gradave të larta, u caktua një komision me anëtarë nga jashtë sistemit të Policisë së Shtetit. 5 vijnë nga ILDKPI, 5 anëtarë nga radhët e pedagogëve, dhe 5 anëtarë u përzgjodhën me konkurrim. Ndërkohë dy fazat e tjera të shqyrtimi të vetting-ut, do të bëhen nga drejtuesit e SHÇBA-së dhe ato të Policisë së Shtetit, të cilët kanë kaluar me sukses fazën e parë të vetting-ut. Përfshirja e SHÇBA-së u bë pas ndryshimeve që kërkoi ministri i Brendshëm, Sandër Lleshaj, pasi, sipas tij, kjo i kursente buxhetit të shtetit mbi 2.6 milionë euro. Në mbështetje të Ministrisë së Brendshme, janë edhe partnerët ndërkombëtarë me misionet e tyre si Pameca e Europol, të cilët kanë asistuar më herët në hartimin e kuadrit ligjor. Procesi i vetting-ut në polici u shty afërisht me 1 vit nga afati përmbyllës që ishte caktuar, data 8 maj 2018.

Sulmet ndaj Policisë së Shtetit, Lleshaj merr në mbrojtje uniformat blu

Publikimi i raportit nga Komisioni Europian për hapjen e negociatave me BE-në u komentua edhe sot në Kuvend nga ministri i Brendshëm, Sandër Lleshaj. Ministri tha se sulmet që janë bërë vazhdimisht ndaj Policisë së Shtetit nuk e kanë cenuar misionin e saj. “Sulmet e gjithanshme, fizike, mediatike, politike, nuk kanë arritur ta cenojnë vendosmërinë e Policisë së Shtetit për të përmbushur misionin e saj në shërbim të sigurisë publike. Treguesit kryesorë që karakterizojnë sigurinë publike në vend, ka vijuar tendencën pozitive të viteve të fundit, duke konfirmuar në mënyrë të pakontestueshme se realisht vendi është në ditët e tij më të mira për sa i përket kësaj fushe jetike, pra sigurisë”. /