Partia e Patozit kontestohet në Kolegj, Bashkimi Demokrat: Të çregjistrohet nga zgjedhjet

Partia e Astrit Patozit, Bindja Demorkatike,  betejën e parë do ta ketë me Kolegjin Zgjedhor, për të mbrojtur vendimin e KQZ-së për regjistrimin e saj si subjekt garues në zgjedhjet e 30 qershorit.  Çështja është ankimuar në Kolegj nga Partia Bashkimi Demokrat, ku theksohet se vendim i kqz-së, cënon kushtet e barabarta në zgjedhje dhe ligjshmërinë e tyre.

Vendimi i Komisionit Qëndror të Zgjedhje që regjistroi partinë e Astrit Patozit,  Bindja Demokratike,  në garën e 30 qershorit edhe pse vendimi i gjykatës nuk kishte formë të prerë,  është ankimuar në Kolegj Zgjedhor.

Ankimimi është bërë nga  Partia Bashkimi Demokrat, ndërsa gjykata ka përcaktuar trupën që do të shqyrtojë çështjen.

Partia Bashkimi Demokrat kërkon çregjistrimin e Bindjes Demokratike dhe për këtë argumenton:

“Vërtetimi i gjykatës, i paraqitur në KQZ nga Bindja Demokratike nuk ka marrë formë të prerë.  Duke futur në garë, në kundërshtim me ligjin për partitë dhe Kodin Zgjedhor, organizata politike të paregjistruara në Gjykatë, KQZ cënon kushtet e barabarta në zgjedhje dhe ligjshmërinë e zgjedhjeve”.

Në ankimim thuhet se Kodi Zgjedhor sanksionon qartë  se “për të marrë pjesë në zgjedhje një parti duhet të paraqesë vërtetimin e regjistrimit në gjykatë”, gjë që sipas akuzuesit, Bindja Demokratike nuk e ka.

“Në të kaluarën, KQZ dhe Kolegji Zgjedhor kanë ndjekur një praktikë të ndryshme nga kjo që KQZ ka ndjekur për Bindjen me kryetar Astrit Patozi”.

Regjistrimi i Bindjes Demokratike për zgjedhjet e 30 qershorit mori 4 vota pro të përfaqësuesve socialistë në KQZ, ndërsa kryetari Klement Zguri kundërshtoi dhe votoi kundër.