Shpëton me fëmijët/ Mirditorit i shpërthejnë makinën me eksploziv

Një ngjarje e cila mund të kishte fund tragjik është shmangur të hënën në mëngjes në qytetin verilindor të Rrëshenit.

Në makinën e shtetasit Tonin Gjini, ishte vendosur një sasi eksplozivi në sediljen e makinës, por fatmirësisht është identifikuar nga ai.

Gjini ka rrëfyer për policinë se makinën e kishte parkuar poshtë pallatit, ndërsa pak më herët ai e kishte përdorur atë për të dërguar fëmijët në shkollë, pasi ishte shi.

Ai nuk e kishte idenë se në makinën e tij ishte e fshehur një sasi eksplozivi dhe që mund të shpërthente nga momenti në moment, duke krijuar kështu edhe një tragjedi në qytetin e vogël verilindor të Mirditës.

Tonin Gjini është shprehur se ka e pikasur lëndën plasëse të llojit eksploziv, por me shumë vonesë, vetëm pasi dërgoi fëmijët në shkollë dhe po rikthehej për në banesë.

Ai ka deklaruar para grupit hetimor se e diktoi pakon e çuditshme, pasi po e shqetësonte diçka në shpinë.

Pas mbërritjes së forcave xheniere, sasia e eksplozivit ka shpërthyer sapo është prekur. Ndërsa, nga shpërthimi i fuqishëm, makina është shkatërruar totalisht.

Tonin Gjini edhe pse është shprehur se nuk ka konflikte me asnjë person dhe se nuk e ka idenë se kush mund t’a ketë vendosur, ai rezulton se ka kryer një dënim për trafik droge prej disa vitesh në Itali.

Lidhur me ngjarjen policia ka sekuestruar kamerat e sigurisë të pallatit, për të bërë të mundur identifikimin dhe kapjen e autorëve