VOA: Petrit Vasilit i kanë mohuar vizën?! Kryemadhi: S’vë dorën në zjarr as për bashkëshortin tim

VOA: Petrit Vasilit i kanë mohuar vizën?! Kryemadhi: S’vë dorën në zjarr as për bashkëshortin tim

Sipas informacioneve të Zërit të Amerikës, autoritetet diplomatike të SHBA i kanë refuzuar vizën nënkryetarit të Grupit Parlamentar të LSI Petrit Vasilit. Ky detaj u bë publik mbrëmjen e sotme gjatë një intervistës me kryetaren e LSI Monika Kryemadhi.

Gazetarja e VOA pyeti Kryemadhin nëse kishte dijeni lidhur me këtë fakt, ndërsa kjo e fundit deklaroi se Vasili është një njeri pa probleme megjithatë, nuk mund ta vërë dorën në zjarr as për fëmijët e as për bashkëshortin e saj.

“Nuk besoj se i është refuzuar viza. Nuk kam informacion. Në qoftë se ka një njeri pa probleme ai është zoti Vasili. Megjithatë unë nuk e vë dorën në zjarr as për fëmijët e mi e as bashkëshortin tim. Por zoti Vasili ka qenë një nga bashkëpunëtorët më të ngushtë të ambasadës amerikane për reformën në drejtësi“, u shpreh Kryemadhi.

Ora 19:21

Kryemadhi ndryshe nga Basha: Dënoj dhunën në protesta, të pushtojmë zemrat jo institucionet

Nga studio e Zërit të Amerikës në SHBA kryetarja e LSI Monika Kryemadhi deklaroi për herë të parë dhunën e përdorur në protestat e opozitës, ndryshe nga lideri demokrat Lulzim Basha i cili tha dje se nuk mund të jetë komandant i zemërimit të qytetarëve.

Kryemadhi tha se LSI nuk ka për qëllim të pushtojë institucionet por zemrat e shqiptarëve.

“Sa i takon dhunës, sigurisht dënoj çdo lloj dhune. LSI nuk ka problem goditjen e institucioneve. Qëllimi i LSI është që të pushtojë zemrat e shqiptarëve. Ajo që ne duam është që Shqipëria të ecë përpara.. Kroacia sot është anëtare e BE ndërsa ne po zvarritemi. Djegia e mandateve ka qenë një veprim ekstrem. Aktet e dhunës nuk e favorizojnë opozitën por viktimizimin e Edi Ramës”, deklaroi Kryemadhi.

Ora 19:19

Kryemadhi flet në VOA për influencën ruse në Shqipëri

Në studion e Zërit të Amerikës, kryetarja e LSI Monika Kryemadhi deklaroi se Shqipëria është një nga shtetet që nuk e ka pranuar influencën ruse pasi kjo e fundit ka dështuar dy herë me vendin tonë.

“Shqipëria është një nga shtetet që nuk e ka pranuar influencën ruse. Rusia ka dështuar dy herë me vendin tonë, në vitet ’70 dhe sot. Nëse Shqipërinë e lëmë me Kosovën dhe Bosnjën, kjo tregon se do ta lemë vendin në dorën ruse. Kjo nuk duhet që të ndodhë, për shkak se ne jemi popull pro-amerikan”, deklaroi Kryemadhi.